amalinks wokungena

Breaking News

Obe ngummeli weLibya eZimbabwe Oxotshiweyo Sesukile Elizweni


Obemela eleLibya eZimbabwe, yena oxotshwe nguhulumende kuliviki ngemva kokusekela abalwisa ukususa umbuso kaMoumar Ghadaffi usukile elizweni ngoLwesihlanu elubhekise kweleBotswana.

UAmbassador Taher Elmegrahi usuke eHarare ngemota esiya eGaborone ngomgwaqo odlula koBulawayo kanye lePlumtree uyengena kweleBotswana ngomngcele weRamakgwebana.

UMnu Elmegrahi wazise ngeviki edluleyo ukubana kasamnanzi uhulumende kaGhadaffi njalo semela inhlanganiso yeNational Transitional Council (NTC), yona esihluthune intambo zombuso eLibya.

Lokhu kubangele ukuthi uhulumede weZimbabwe amxotshe ngoba esithi kalabudlelano leNTC.

Okhulumela uhulumende weBotswana uMnu Jeff Ramsay utshele lumsakazo ukuthi ngempela uElmegrahi ungenile kulelolizwe. Kodwa uthe akalaqiniso lokuthi ulubhekise ngaphi ngoba engacelanga ukuhlala kulelo lizwe.

Iziphathamandla zeSouth Africa zithi uElmegrahi unikwe ivisa yokungena kulelolizwe ukuze agade indizamtshina eJohannesburg Airport.

Kodwa akwaziwa ukuba ulubhekise eLibya kumbe hatshi. EleBotswana ngelinye lamazwe awezwekazi leAfrica asenanze abalwisana loGadhafi eLibya abe NTC.

Umabhalane kugatsha olubona ngobudlelwano beZimbabwe lamanye amazwe uMnu Joey Bimha utshele iStudio 7 ukuthi bazavuselela ubudlelwano leLibya kungaba lohulumende onanzwa ngumanyano weAfrican Union.

Ingcwethi ecubungula ezombusazwe uMnu Dumisani Nkomo uthi uhulumende weZimbabwe uphambanise kakhulu ngokuxotsha uElmegrahi.

XS
SM
MD
LG