Umdlali owayedlala eyimvimbi kumaqembu abalisa ele Monomotapa lele Chicken Inn, uMorgen Mungombe, udla amahabula edlala engumgadli kuqembu le Chiwororo lona elidlala kuSouthern Region Division One Soccer League.
UMungombe ubengumgadli wakuqala ukuthatha umvuzo ophiwa umgadli olitshayela emambuleni okwedlula abanye owe Southern Region Soccer League Top Goal Scorer of the Month ngemva kokuba ehlohle kane kumidlalo emine ngenyanga kaMabasa kumidlalo eyesigaba se Southern Region Division One Soccer League.
Lumdlali uphiwe amadola alikhulu lamatshumi amahlanu ngabe Nokel Security njalo uthi uyathokoza ngoba izinto sezimhambela kuhle emdlalweni wenguqu ngoba eke wayekela ukudlala ngemva kokwehlukana leqembu le Chicken Inn.
“Ngithabe kakhulu ngoba ngemva kweminyaka phose emibili ngingadlali ibhola ngiphenduke sengidlala njengomgadli njalo ngahle ngafika ngaphakamisa isicoco esokuba ngumgadli ohlohle kanengi.”
UMungombe uhlale isikhathi esithile ezidlalela ibhola lokuzilibazisa ngemva kokwehlukana leqembu le Chicken Inn lona elimthenge ngomnyaka ka 2014 esuka kuqembu le Monomnotapa.
Nyakenye umnyaka usuphakathi laphakathi ubizwe kuqembu leToronto elidlala kusigaba se Bulawayo Province Division Two lapho afike wadlala engumgadli.
Ekuqaleni kwalonyaka ke uthethwe liqembu leChiwororo njalo uthi isifiso sakhe yikuba alitshayele emambuleni kuyo yonke imidlalo azayidlala.
“Ngifuna ukuthi ngihlohle phose mihla yonke ngitshengise abafana engidlala labo indlela njengoba kuyimi engimdala kuleliqembu. Ngikhangelele ukuba ngihlohle amagoli edlula itshumi lanhlanu.”
UMungombe uzelwe ngomnyaka ka 1988 ngosuku lwakuqala lwenyanga kaNhlolanja okutsho ukuba uleminyaka engamatshumi amabili lasifica munwe munye.
Uzalelwe edolobheni leHwange kodwa yena ekhaya kubo kuseBinga njalo ufunde ezikolo ezibalisa iHwange Primary School, iKamativi Primary School kanye le Chipindura High School ese Bindura.
Uke wadlala kuqembu le Mwana Africa elalingelakhonale eBindura kodwa udume esedlalela iqembu le Monomotapa ahambe kilo ngo 2009 ikanti uke wadlala kuqembu labasakhulayo elimela ilizwe le Zimbabwe wabizwa njalo lakuqembu lama Warriors.
