amalinks wokungena

Breaking News

Abatsha Besifazana Bahlangana Becebisana Ngendubo Zabo


Abesifazana abasakhulayo abangamakhulu amabili abavele kumagumbi amane elizwe, babuthene emahofisini eZimbabwe Women’s Bureau eHarare ngoLwesine bebonisana phezu kwendubo abahlangana lazo elizweni ngenhloso yokucebisa uhulumende omutsha weZanu PF indlela angazisebenzisa ukuqeda lezi ndubo.

Abaqoqe lumhlangano, phansi kwesihloko esithi “Taura Young Women’s Conference" abe Zimbabwe Young Women’s Network For Peace Building, batshele intathelizindaba ukuba inhloso yikuphuma lemibono uhulumende omutsha we Zanu PF angayisebenzisa ukuziqeda lezinkinga abesifazana abatsha ababhekane lazo.

Umkhokheli walinhlanganiso yabesifazana abatsha yeZimbabwe Young Women’s Network For Peace Building, unkosazana Grace Chirenje uveze ukuba inkulumo zalumhlangano zikunhlangothi ezimbili.

Lezi ngezibalisa ukuphatheka kwabesifazane abatsha laba kundaba zezombusazwe kanye lakuhlelo lukahulumende lokunikeza umnotho kuzizalwane zeZimbabwe olwe Indiginisation and Youth Empowerment.

UChirenje uveze njalo ukuba abehofisi yogatsha lwabesifazane,ukulinganiswa kwamathuba phakathi kwabesifazane labesilisa bathembise ukuba bazimisele ukusebenzelana labesifazana abatsha laba kundaba zentuthuko.

Abogatsha lwabasakhulayo bona bakhuthaza abatsha laba ukuba baphatheke labo ekuqhubeni amabhizimusi afana lelokuthwala uzulu kuveza uChirenje.

Kuthi unkosazana Grace Wagoneka osebenza labenhlanganiso ye Munhanga Phase Forum Trust laye obekulomhlangano uthi isiqokoqela sendubo zabesifazane yikusweliswa kwabesifazane amathuba okuzithuthukisa kanye lemibono kazulu egxile kakhulu kwezesiko athi likhangelela owesifazane phansi.

U Wagoneka uthi ufisa kube lokusebenzelana phakathi kwengatsha ezisebenzelana labatsha labesifazana abatsha laba kube khona ukuzwisisana phakathi kwamaqembu omabili la.

Unkosazana Lillian Mukuku ungomunye wabesifazana abatsha abasebenza labenhlanganiso ye Zimbabwe Young Women’s Network for Peace Building ungomunye abangene lumhlangano walamuhla.

Ukhala ngohulumende uMukuku ethi lanxa ehlezi ekhuluma phezu kwendaba zokuthuthukiswa kowesifazana kusukela ilizwe lithola uzibuse ngomnyaka ka 1980,kusobala ukuba yinkulumo nje kungekho okwenziwayo ngalokho.

Unkosazana Sithabiso Ndlovu yena ovele koBulawayo ukhala ngabezombusazwe athi bakhohlwa ngomama omutsha kundaba zentuthuko kodwa babafune ngesikhathi sekudingwa ukuba bavotelwe ikakhulu kwelemaNdebeleni.

UMaNdlovu ukhuthaza uhulumende kanye labezombusazwe ukuba bahambelana lesikhathi,bakhuthaze abatsha laba ukuphatheka emisebenzini ephathelene lokusetshenziswa kwemitshina yakulezi nsuku njengoba kuyikho asebekufundiswa ezikolo lasemakolitshini.

Abesifazana abatsha laba,abaleminyaka ephakathi kwelitshumi lasithupha kusiya kwengamatshumi amathathu lanhlanu baveze njalo ukuba akuncedi ukuba uhulumende abelokhu ebakhuthaza emsebenzini yentuthuko, engabasindiyo,ebikhuthazwa kusukela ilizwe lithola uzibuse okubalisa ukuthunga impahla,ukufuya inkukhu kanye lokuchola idobi.

Bona abesifazana laba bathi mabatholiswe amathuba labo bangene kwezokulima lezemigodi hatshi ukube lokhe kuthiwa yimisebenzi yabobaba, ikhitshwe lemigoqo ekhona ebavimba ukuba baphatheke emisebenzini emqoka hatshi ukuba lokhe kuthiwa kabaphathe imisebenzi yokuchola idobi.
XS
SM
MD
LG