amalinks wokungena

Breaking News

UMhlophe loMoyo Yibo Asebeziphethe kuHighlanders


Umgcinisihlalo weqembu leHighlanders omutsha uKenneth Mhlophe.

Iqembu leHighlanders selilomgcinisihlalo lonobhala jikele abatsha ngemva kokhetho olwenziwe ngeSonto; umgcinisihlalo nguKenneth Mhlophe njalo unobhala jikelele nguIsrael Moyo.

Owayefuna ukuncintisana loMhlophe, uErnest Mapepa Sibanda, wavinjwa yiziphathamandla zeBosso zisithi watshaphaza imali yeqembu ngesikhathi esangumgcinisihlalo kudala.

UMhlophe uthembise abalandeli beHighlanders ukuthi uzasebenza gadalala ukuvuselela leliqembu njalo uthe uzimisele ukuqeda isikwelede salo.

“Ngithanda ukubonga abalandeli beqembu leHighlanders ngokungipha ithuba lokuba ngikhokhelele into yabo leyi engiyiqakathekisa kakhulu njalo ngiyababonga ngokungithemba ukuba ngibabambele into yabo kuminyaka emithathu elandelayo,” kutsho uMhlophe.

Unobhala jikelele uMoyo unqobe uSiphatho Ncube loNkululeko Ndlovu ngemva kokuthola amavoti alikhulu lane. UNcube uthole angamatshumi ayisithupha kwathi uNdlovu wathola alitshumi lanhlanu.

UWisdom Mabhena uyale elokhu elilunga lekomidi yeqembu ngemva kokunqoba uPeacot Hadebe, uCharles Moyo kanye lo Samuel Silandulo Sibanda.

Umlandeli weHighlanders uDuduzo TK Sibanda utshele iStudio 7 ukuthi ulethemba lokuba abavotelweyo laba bazasebenza ngendlela ebukekayo.

“Ngibathembile, imali yami yonke ngiyifaka kibo ikakhulu kumdala uMhlophe,” kutsho uSibanda.

Abanye abayingxenye yenkokheli yaleliqembu ngumsekeli kamgcinisihlalo uModern Ngwenya lomphathingcebo uDonald Ndebele.

Ababili laba kabangangenanga kukhetho ngoba besasalelwe ngumnyaka owodwa besezikhundleni kungakadingakali ukuba bevotelwe kutsha.

please wait

No media source currently available

0:00 0:01:49 0:00

Facebook Forum

XS
SM
MD
LG