Ubufakazi obukhona buveza ukuba abesifazane labantwana abangamantombazana abaphila lobugoga babhekane lenkinga eziphindwe kabili kudaba lokuhlukuluzwa emulini ukwedlula abanye bonke ngesikhathi ilizwe limanyana lamanye ukunanza insuku ezilitshumi lasithupha, zokuqakathekiswa kokulwiswa kwezehlakalo zodlakela kuhlelo olwe 16 days of Activism Against Gender Based Violence.
Lokhu kuvezwe ngabaphila lobugoga obehlukeneyo emhlanganweni wokubonisana phezu kwenkinga abesifazane abaphila lobugoga abahlangana lazo sikhathi sonke, owenzelwe kuhlangothi lwePublic Affairs, ehofisini yommeli we Melika eZimbabwe, uqoqwe ngabenhlanganiso ye Disability, HIV/AIDS Trust.
Umnumzana Edwin Ndlovu nguye obona ngezokuhlelwa kwenhlelo eziqondiswe kwabasakhulayo kulenhlanganiso ye DHAT. Utshengise ukukhathazeka ngokuqnga kwenani labahlukuluzwa ngoba bephila lobugoga.
Kuba ngokuphindwe kabili nxa kuyikuthi lowo muntu engowesifazane loba eyintombazana njengoba ekhangelwa njengento nje hatshi ukuba ungumuntu ozwa ubuhlungu laye kutsho uNdlovu yena ongaboniyo.
Unkosazana Faith Tori ungomunye wabaze kulomhlangano. Yenake uthi kuvele kunzima ukuphila lobugoga kodwa kuba nzima ngamandla nxa uphakathi kwabantu abangela ndaba lawe.
UBathabile Dlamini uyisifundi ekholitshini le NUST, okwamanje eqhuba ekuhlangothi lwezokukhulumisana lentathelizindaba. Uveze ukuba bakubone kufanele baqhube lumhlangano njengendlela yokwandulela ukusungulwa komkhankaso wensuku ezilitshumi lasithupha, wokudinga indlela zokulwisa ukuvimba ukuhlukuluzana kwabantu emulini lendaweni zonke zempilo.
Bawenze ngoba sebakunanzelela ukuba ziyasilela inhlelo eziqondana labaphila lobugoga hatshi emahofisini abo kuphela kodwa lakuzulu wonke lohulumende kuveza uMaDlamini.
Lumhlangano we “Food For Thought ”, owenziwe lamuhla phansi kwesihloko esithi Creating a World Of Possibilities for Women with Disabilities”, kube yinxenye yomhlangano wensuku ezintathu oqhutshwa ngabe DHAT bemanyene labohlangothi olubona ngezokukhulumisana lozulu emahofisini wommeli weMelika eZimbabwe olwe Public Affairs Section, oqondane lokukhangela izanhluphe zabesifazana, owe Women In Leadership and Disability.