Abenhlangansiso ye Institute for Young Women Development- IYWD bemanyene leye Real Open Opportunities for Transformation Support ( ROOTS ) baphawule umkhankaso wensuku ezilitshumi lasithupha, zokulwisana lokuqeda udaba lokuhlukuluzana kwabesifazane labesilisa olwe 16 Days of Activism against Gender Based Violence emkhosini owenzelwe e Chipadze Stadium eBindura.
EleZimbabwe likhuthazwa ukuqakathekisa lumkhankaso nsuku zonke, lanxa bemanyana labanye umhlaba wonke ukuqhuba limikhankaso phakathi kwalezi nsuku kusukela lamuhla kusiyafika umhlaka 10 wenyanga kaMpalakazi.
Zikhona njalo ezinye inhlanganiso okubalisa eye Disability HIV and Aids Trust, esebenza njalo leye Women In Leadership and Disability in Zimbabwe ( WILDZ ), lazo ebeziluqakathekisa lolusuku lwalamuhla, zaba lemihlangano ephezu kwalomkhankaso.
Limikhankaso ikhangela uzulu wonke lanxa izehlakalo zokuhlukuluzwa ngendlela ezehlukeneyo zande kwabesifazane kuveza obona ngezokuhlelwa kwenhlelo enhlanganisweni ye Disability HIV and Aids Trust, esebenza njalo leye Women In Leadership and Disability in Zimbabwe ( WILDZ ), unkosazana Sally Nyakanyanga.
Bahlangana lemihlobo yonke yokuhlukuluzwa abesifazane laba okubalisa ukudlwengulwa kuveza unkosikazi Cynthia Hakutangwi, oqhuba imisebenzi kwezokukhulumisana ( Communications and Marketing Executive ),udlwengulwe esesemncinyane ngemva kokuba abazali bakhe sebehlukene kwamenza waphila kanzima.
Omela abaphila lobugoga laba edale lephalamende Senator Anna Shiri, ophila lobugoga laye, uthi kusuka kube nzima kakhulu kwabagogekileyo, kubuye kuphindwe kanengi nxa lowo muntu kungowesifazane.
Ukhuthaza uhulumende ukuba aziqakathekise lezondaba eziphezu kokuhlukuluzana, njengoba lokhe zisanda lanxa sekulomthetho obeka umlandu kulowo oyabe ehlukuluze omunye ngendlela ezehlukeneyo.
Umqondisi enhlanganisweni esebenza labesifazane abaphila lobugoga ye Disabled Women's Support Organisation (DWSO),unkosikazi Rejoice Timire uthi inkinga yikuba engazilandeli kangano uhulumende lezo ziqondiso lezivumelwano angina kizo.
Abakhankasela ukuqedwa kodubo lokuhlukuluzana bathi kuqakathekile ukuba lukhangelwe njengodaba oluphazamisa intuthuko yelizwe loludaba lokuhlukuluzana kwabesilisa labesifazane.
