Umkhuhlane wesihudo eseCholera osuthethe imiphefumulo yabantu abane edolobheni le Chegutu sikhulumanje. Uhulumende uphinde waxwayisa uzulu ukuba alondoloze impilakahle yakhe ngokuhlala ehlanzekile, enatha amanzi lokudla okuhlanzekileyo sikhathi sonke.
Ngasikhathi sinye uhulumende ukhuthaza omanisipala ilizwe lonke ukuba baguqule indlela abasebenza ngayo kwezokutholiswa kukazulu amanzi ahlanzekileyo sikhathi sonke, ukuthwalwa kwezibi ngesikhathi, ukulondolozwa kwempompi ezithwala ingcekeza kanye lokulungisisa udubo lwabathengisela endaweni ezingavunyelwayo ukulwisana lokuqeda loludubo lwesihudo se Cholera elizweni.
Umphathintambo wezempilakahle u Dr David Parirenyatwa,u tshele umhlangano lentathelizindaba ukuba lesi sixwayiso siza ngemva kokuqhamuka kwesihudo se cholera eChegutu, esigabeni se Mshonaland West mhla ka 18 Zibandlela lomnyaka.
UParirenyatwa uveze ukuba sebengamatshumi amathathu okwamanje, abacatshangelwa ukuba bahlaselwe yisihudo secholera kulababili asebesaziwa ukuba balawo ngempela lumkhuhlane wabulala abane. Uthi bacabangela ukuba lokhu kubangelwe yimfa yowesifazane oleminyaka engamatshumi ayisitshiyagalombili-80, ngemva kokuhlaselwa yilesi sihudo mhla ka 8 Zibandlela 2018.
Abanye balabo abaye emgcwabeni baqalise ukuba lezibonelo zomkhuhlane, basebesiyadinga usizo esibhedlela.
Uxwayisa uzulu uParirenyatwa ukuba azinakekele, labomanisipala ukuba baphathe eyamo indima ekwenqabeleni ukuqhubeka kwalomkhuhlane uhlasela abantu.
Okhokhela uhlangothi lwezokuvikelwa kokuqhamuka kwemikhuhlane kugatsha lwempilakahle, u Dr Gibson Mhlanga ulandisa phezu kwesimo ngalesi sihudo secholera.
U Dr Mhlanga uveze njalo ngenyathelo eselithe lathathwa nguhulumende, ukulonda bonke abaphatheke esililweni sowesifazana obhubhe ngemva kokuhlaselwa ngumkhuhlane okulapho abezempilakahle abacabangela ukuba yikho okwasukela khona udubo lwesihudo se Cholera e Chegutu.
Njengoba lo kungumkhuhlane obangelwa khakhulu yibutshapha, u Dr Mhlanga uthi kuqakathekile ukuba uzulu azinakekele ngazo zonke izikhathi ahlale ehlanzekile.
Ukhuthaza omanisipala labo kumele babone ukuba bayawuqhuba umsebenzi wokulondoloza uzulu kakhulukazi kwezokuthwalwa kwengcekeza kanye lokutholisa amanzi ahlanzekeliyo kuzulu.
Okhulume emele abenhlanganiso ebona ngezempilakahle emhlabeni jikelele eye World Health Organisation – WHO, u Dr Juliet Nabyonga uthi ibajabulisile ngempela indlela uhulumende aphathe ngayo udubo lokuqhamuka kwalomkhuhlane wesihudo se cholera.
Okusekelwe ngoze emele inhlanganiso ye United Nations Children’s Funds – UNICEF, uDr. Mohammed Ayoya.
Uhulumende uveze ukuba isehlakalo se Chegutu sesibenze bahalala bengabalungiselela ukulwisana lalesi sihudo ezigabeni zonke zelizwe.
