“EleZimbabwe livulekile kulabo abalesifiso sokuzevula amabhisimusi abo.”
Le yingoma uMongameli Emmerson Mnangagwa asesaziwa ngayo njalo aqhubeke eyihlabela emhlanganweni wokulobelana isivumelwano sokuthengiselana phakathi kwamazwe aseAfrica, eseAfrican Continental Free Trade Area ngoLwesibili.
UMnangagwa ungomunye wabakhokheli beAfrica abathe gwaqa kweleRwanda lapho abazasayinelana khona isivumelwano lesi ngoLwesithathu.
Ekhuluma kunkulumompikiswano labakhokheli benhlanganiso ezitshiyeneyo uMnangagwa uchaze isivumelwano lesi kanje:
“Siqakathekile ngoba siletha ndawonye amazwe eAfrica angamatshumi amahlanu lanhlanu ukuthi anathe emkambo munye olabantu abangu1, 2 billion,” kutsho uMnagagwa.
“E-Africa kudingakala amanzi ahlanzekileyo. Angithandabuzi ukuthi izwekazi leAfrica lingenelisa ukuhlambulula amanzi alo lincedisa njalo wonke amazwe ukuthi abe lokudla okwaneleyo.”
UMongameli Mnangagwa uthe kuqakathekile ukuthi ohulumende baseAfrica basebenzelane ndawonye lenhlanganiso ezizimeleyo belalele izikhalazo zazo eziphathelane lenhlalakahle kazulu njalo bezilungisise.
Wengeze wathi ukuze isivumelwano sokuthengiselana lesi silethe intuthuko emazweni aseAfrica, kuyadingakala ukuthi ohulumende babe lenhlelo ezihuga osomabhizimusi lamankampani, ezigoqela ukuhlonipha amalungelo oluntu lokulandela umthetho, irule of law.
“EleZimbabwe selilesikhathi letheswe izijeziso. Ngakho kumele senze ukuthi umumo okhona ukhanga imali evela ngaphandle. Okwesibili, amanyuvesi kumele ephume lenhlelo ezihambelana lekusasa esililoyisayo kulokuqhubeka efundisa izifundo zamazwe aphetsheya,” kutsho uMnangagwa.
Ingcwethi kwezenotho uMnu Masimba Kuchera uthi isivumelwano lesi silakho ukusebenzela eleZimbabwe ngokuya kwesikhathi nxa selisenelisa ukuthengisa impahla enengi kwamanye amazwe.
Umnotho weZimbabwe utshiywe nguMnu Robert Mugabe uguqe ngamadolo njalo uqhubeka usadalala.
Lanxa bekhona abathi uMnangagwa laye ukhanya esehluleka ukuwuvuselela, abanye bathi kusasemasinyane ukumahlulela.