UMongameli Emmerson Mnangagwa ubike ukuba uhlelo lwe Command Agriculture lolwe Presidential Input Scheme alulani lokudinga usekelo kukhetho ngakho-ke uhulumende uzaqhubeka esekela inhlelo lezi ukuze ilizwe liqhubeke lizilimela ukudla okwenela umuntu wonke elizweni.
UMnangagwa utsho lamazwi ngoLwesihlanu emini evula okusemthethweni umbukiso wezokulima lamabhizimusi owe Harare Agricultural Show lapho akhuthaze abalimi ukuthi sokuyisikhathi sokuthi ele Zimbabwe lisebenzele ukudla okusuthisa ilizwe.
Uhlelo lwe Command Agriculture lwaqala ngesikhathi owayengumongameli welizwe, uMnu. Robert Mugabe, esesesikhundleni lukhokhelelwa nguye uMnangagwa kodwa abanengi ababelusola besithi yindlela yokudinga amavoti.
Abasolayo bathi inhlanyelo lemvundiso eyefethilayiza okuphiwa abalimi ngaphansi kohlelo lolu kuvame ukwengezwa ngesikhathi sokhetho.
Ukulandule lokhu uMnangagwa esithi uhulumende wabela abantu inhlanyelo esenzela isivuno selizwe hatshi amavoti.
“Ngifuna ukutsho ukuthi uhulumende wami uzasekela iCommand Agriculture le Presidential Input Support Scheme. Ukuphiwa kwezinto zokusebenzisa ekulimeni phansi kwenhlelo lezi okomnyaka ozayo sokuqalile kuzancedisa abalime ukusebenza. Inhlelo lezi kayisizo zokudinga usekelo kodwa ngezokuthi silungisise indaba zokulima.”
Wengeze ethi izigaba zonke zelizwe zizathola usekelo ngaphansi kohlelo lolu.
Kodwa uMnu. Nkosiyabo Sibanda uthi uMnangagwa akakhulumi iqiniso ngohlelo lolu.
“Uhlelo lwe Command Agriculture nxa ubala ungathi luhlelo lukahulumende. Kodwa ungabona indlela olwenziwa ngayo ozathola ukuthi lolu hlelo lulokwenza lezombangazwe welizwe. Uzathola ukuthi ama inputs asetshenziswa ukuthola amandla awombangazwe.”
Amazwi la asekelwa nguNkosikazi Similo Maphosa yena obesemkhosini wanamhlanje esithi akulamehluko phakathi komsebenzi webandla leZANU PF lemisebenzi kahulumende.
