Udlakela oluqhamuke eZimbabwe emavikini amabili edluleyo yilo olubikwa luyimbangela yokwehluleka kuka Mongameli Emmerson Mnangagwa ukuya emhlanganweni omkhulu weRally, webandla lakhe leZanu PF, eMt Darwin.
Lokhu kugcizelelwe langumgcinisihlalo weZanu PF uNkosikazi Oppah Muchinguri Kashiri lapho ebulisa obuye ukuzommela kulumhlangano umsekeli kamongameli uMnu. Kembo Mohadi.
Umsekeli kamongameli uthe esekhuluma laye wagcizelela kulokho esithi uMnangagwa uphatheke emsebenzini wokwamukela izethekeli eziqakathekileyo ezivela kwamanye amazwe eziza elizweni ukuzozwisisa imbangela yokuqhamuka kwalolu dlakela.
UMohadi usole abenhlanganiso ezizimeleyo esithi yibo ababangela ukungahlaliseki elizweni bethunywa ngamazwe abaphathisa ngemali ukuthi badonge ukuthula besebenzelana labamabandla aphikisayo.
Ukungabuyanga kukaMnangangwa kucunule amalunga ebandla lakhe amanengi abatshone betshiswa lilanga ilanga lonke bemelele bazotshelwa sokule ukuthi akabuyi.