Izikolo zako Bulawayo ezibalisa ese Nkulumane, ese Sizane, ese Founders kanye lese Eveline sezifinyelele kusigaba se quarter – final kumncintiswano we Lakers Foundation Annual 3 Day Under 16 Tournament kucele lamankazana.
Limidlalo eqoqwa kuthakazelelwa ukufikisa kwenhlanganiso ye Lakers Foundation iminyaka elitshumi yasungulwayo ingenwe yizikolo eziphuma kumagumbi wonke elizwe le Zimbabwe.
Umqeqetshi weqembu lamantombazana elesikolo seSizane uTatenda Mbengegwi uthi lumncintiswano uzaphathisa kakhulu abantwana bako Bulawayo bona abangatholi amathuba amanengi okuncintisana.
"Kulicebo elihle ukuba lemidlalo efana lale ngoba lapha ko Bulawayo asilazo izikolo ezinengi eziqakathekisa ukudlala lumdlalo. Lokhu kubangela ukuba sihlale sinqotshwa ngamaqembu asuka eHarare ngoba uzathola ukuthi lapha thina sincintisana siyizikolo ezifika phose itshumi lanhlanu ikanti eHarare uyathola kulezikolo ezedlula amatshumi amahlanu ezidlala lumdlalo".
Ezinye izikolo esezidlulele kusigaba se quarter – final kucele lamankazana ngezibalisa ese St James, ese Girls High A kanye lese Girls High B kanye lese St Francis.Umqeqetshi weqembu labafana elimela isikolo se Thekwane uMbongeni Gwenzi uthi bafunde okunengi ngokuphatheka kulumncintiswano.
"Ukudlala lezikolo ezihamba phambili emdlalweni we basketball kusiphathise kakhulu ngoba kusiphe ithuba elokuba sifunde kuzo njalo nxa singaqhubekela phambili siphatheka kumidlalo efanayo singazithola sesisezingeni eliphezulu kakhulu ngemva kweminyaka emine"
Imidlalo le iqhutshelwa esikolo se Eveline kanye lasendaweni ye Khanyisile Sports Centre njalo ikhangelelwe ukufika emaphethelweni kusasa ngoMgqibelo.
Inhlanganiso ye Lakers Foundation ilenhlelo ezokuqoqa njalo eminye imncintiswano emibili lonyaka njengengxenye yemikhosi eyokuthakazelela ukufikisa kwayo iminyaka elitshumi.
Ngenyanga kaNhlolanja kukhangelelwe ukuba baqoqe imidlalo yabadlali abaleminyaka elitshumi lantathu kuthi umnyaka ususiyafika komlindi uyacina bazaqoqa imidlalo ezangenwa ngamaqembu aphuma kwamanye amazwe.
