amalinks wokungena

Lokhe Egijima Okumangalisayo uSamukeliso Moyo

  • Joseph Njanji

Akapheli moya umdlali wokugijima uSamkeliso Moyo yena oqhubekela
phambili ebonisa izithende abadlali abancane khatshana kulaye.

USamukeliso Moyo yena oleminyaka engamatshumi amane lantathu
eyokuzalwa, uphutshe esendaweni yesine kumjaho we Senior Women’s 10km obuyingxenye yomncintiswano we National Cross Country Championships eqhutshelwe edolobheni lako Bulawayo ngempela viki edluleyo.

Umjaho we Senior Women’s 10km ubungenwe ngabadlali abalitshumi lathobaminwe mbili njalo onqobileyo nguRudo Mhonderwa, kundawo yesibili kube lo Patience Murowe kuthi uBertha Chikanga uphutshe esendaweni
yesithathu.

Bobathathu abadlali abaqede bephambi kuka Moyo bebemele isigaba se
Harare kuthi uMoyo yena ubeliqembu elizimele lodwa.

UMhonderwa uzelwe ngomnyaka ka 1995 okutsho ukuba kuleminyaka
engamatshumi amabili lanye phakathi kwakhe lo Moyo njalo bebembalwa
abadlali abazalwa ngomnyaka ka 1997 abaqede ngemva kuka Moyo loba nje
ebatshiya ngeminyaka engamatshumi amabili lantathu.

UMoyo, oqale ukuncintisa evele eseleminyaka engamatshumi amabili
lanye, uthi ukuziphatha yikho okumenza ayale elokhu ebonisa izithende
abantwana abancane angabazala.

“Into engingathi yimfihlo yami yi discipline. Abantwana kumele kube
ngabantwana abatshelekayo. I-training ivele ibuhlungu ngiyakwazi
abanengi yikho abakubalekelayo njalo kuqakathekile ukuba ube lomuntu
okucebisayo.”

Onqobe kumjaho we Senior Men’s 10km ngu Wellington Varevi owase
Harare, kuthi oqede ekundawo yesibili nguCannisious Nyamutsita, kwathi
oqede ekundawo yesithathu nguMoses Tarakinju, ikanti oqede osendaweni
yesine ngu Jacob Mugomeri.

Bobane laba badlali bazakuba yingxenye yeqembu elizamela ilizwe le
Zimbabwe kumncintiswano we World Cross Country Championships
ozaqhutshelwa elizweni le Uganda.

UVarevi utshele intathelizindaba ukuba ulethemba lokuqhuba kuhle
kumidlalo yezizwe zomhlaba le ngoba indawo ye Hillside ilungele
imidlalo ye cross country.

“Imdlalo ubulunge kakhulu. Ama challenges amanengi esikhangelele ukuba
sibhekane lawo ku cross country siwatholile lapha yikho ke ngiyabonga
abaqoqi balumncintiswano kanye loNkulunkulu ngokungipha amandla.”

Kucele labesifazane uMhonderwa nguye ozakuba yingxenye yeqembu elimela ilizwe leZimbabwe ndawonye lo Tatenda Ndlovu wako Bulawayo yena onqobe kumjaho we Junior Women’s 6km.

Kucele le Junior Men’s 8km race kunqobe uTanaka Hove oweManicaland
kwathi endaweni yesibili bekulo Dumo Mkhwananzi owako Bulawayo.
Bobabili uHove lo Mkhwananzi bazakuba yingxenye yeqembu lesizwe
elizakuyancintisa kwele Uganda.

Facebook Forum

XS
SM
MD
LG