Ekhuluma lentathelizindaba enkundleni eyeRufaro stadium lapho uzulu akade ezevalelisana lomufi, isikhulumeli semuli ongumzukulu womufi, uMnu. Leo Mugabe uthe bazalandela okwesiko ngendlela induna ezibekwa ngayo njengoba uMugabe wayeyinduna esigabeni sakhe.
Uhulumende ubikwa ezaqala ngohlelo lwakhe lombiko kamongameli uEmmerson Mnangagwa, kanye le 21 gun salute eveza inhlonipho yeqhawe lesizwe, andubana inkokheli zomdabu ziqhube olwazo uhlelo.
“UMugabe uzabekwa emathuneni eHeroes Acre. Lokhu kuzenzakala ngeNsonto. Kuzaqala ngohlelo lukahulumende oluqoqela i21 gun salute lokunye okunjalo. Ngemva kwalokhu inkokheli zomdabu zizamthatha ziqhube inhlelo zesiko. Ngemva kokuba seziqedile uMugabe uzangcwatshwa yizihlobo zodwa.
Bekulesimo sokudana okukhulu enkundleni yeRufaro Stadium lapho abasekeli beZanu PF abavele ezabelweni ezinhlanu zelizwe babuye ukuzovalelisa uMugabe. Kodwa abanye abafana lo mnumzana Delma Ndlovu baveze ukukhathala ngokwenzakalayo.
“Thina njengomphakathi siyazwisisa ukuthi uMugabe ukubekwa kwakhe kulandela amasiko akibo kodwa sibona angani sebethethe isikhathi eside kakhulu, ngoba umuntu owabhubha kuviki edluleyo lanamuhla kulokhu kungazakali ukuthi uzabekwa nini ngibona angani sekuthatha isikhathi eside njalo silethemba ukubana bengayenza konke okwenziwayo beyazise umphakathi ukuthi ubaba uMugabe uzabekwa ngaphi njalo njani, njalo vele kuhamba njani ngoba kukhanya kulokungazwani okukhona”
Lokhu kugcizelelwe yingcwethi ecubungula ezomnotho, umnumzana Mlungisi Nduna othe ilizwe selilahlekelwe yisikhathi esinengi likhangelane lomngwabo kaMugabe.
“Ukuthi owayengumongameli welizwe uMugabe alahlwe kuthatha isikhathi eside ukubana kuqedisiswe. Imuli yakhe idonsela le lohulumende edonsela le kodwa namhlanje sinanzelele ukuthi kade sebe khuluma ngelizwe linye ukuba uzangcwatshelwa eHereos Acre. Bekungadanisa sibili ukuthi engangcwatshelwa eHeroes Acre ngoba nguye owayisungula iHeroes Acre. Esikunanzelelayo yikuthi kuyadingakala ukuthi indaba le iqedwe masinyane ngoba isithathela isizwe iskhathi esinengi okungabe kusenziwa izinto ezilengqubelaphambili endabeni zenotho. Sike sabona lasemaphephandaba uhulumende evuma ukuthi izinto zakhwela ngesilinganbiso esifika 100% ngeviki linye njalo imali yakuleli ilize isilahlekelwe ngesilinganiso esingafika ku 33 percent ngeviki yonale kukhulunywa ngomngcwabo kaMugabe”
Kunjalo umkhokheli webandla eliphikisayo ele MDC umnumzana Nelson Chamisa unikezwe ithuba lokuhlala labahloniphekayo NgoMgqibelo embuthanweni wenkundleni yeNational Sports Stadium lapho abanye abahlonitshwa labazavela phandle kwelizwe abazabe behlezi khona.
Lokhu ngokwakuqala ngemva kokhetho olwedluleyo ukuthi uChamisa aphiwe inhlonipho yokuthi abe ngomunye wabahlonitshwa emkhosini oqhutshwa nguhulumende.
Lonyaka uChamisa wancitshwa indawo yokuhlala labahloniphekayo eekungcwathweni kwamaqhawe esizwe uOliver Mtukudzi lo Dumiso Dabengwa.
Kodwa unkosikazi Faith Nsingo oyintatheli yezindaba uthi le yindlela yokuvala amehlo abahloniphekayo abazavela kwamanye amazwe.
“Ukuphiwa iVIP ticket kuka Chamisa ukuthi ehambe umfeni nka Robert Mugabe kutshengisela ukuthi kuMnangagwa uzama ukutshengisela laba abahloniphekayo ababuyayo emfeni ukuthi sibambene njenge lizwe kodwa khona kusazakala ukuthi akula kubambana okukhona. Lokhu ufuna ukuvala abantu amehlo nje”
Imizamo yokukhulumisana lesikhulumeli seMDC uMnu. Daniel Molokele ecingweni ukuthi asazise ngokunxuswa lokhu yehlule. UChamisa ubonakale izolo emzini kaMugabe eBlue Roof, ezoduduza umfelokazi lemuli.
Abahlonitshwa abagoqela inokheli yamazwe leyake yakhokhela amazwe sebeqalisile ukufika elizweni ukuzohlanganela labemuli ye Zimbabwe embuthanweni omkhulu womthandazo wokuvalelisana lowayengumongameli uMugabe ozaba enkundleni yeNational Sports Stadium eHarare.
Njengokutsho komzukulu womufi lokhu kungacaci ukuba umngcwabo okhokhelwa ngabemuli uzakwenzelwa ngaphi njalo nini.
