UMeli weInsiza South edale lephalamende njalo elilunga leMDC ekhokhelwa nguMnu Welshman Ncube uMnu Siyabonga Malandu Ncube uthi kajabuli lakancane ngendlela amapholisa aqhuba ngayo udaba lwakhe lapho amangalele khona ake wathandana laye uSimiso Mlevu ukuthi umthumela inhlamba.
UMnu Malandu umangale enkambeni yeCentral Police Station koBulawayo ngeviki edluleyo ukuthi uMlevu umthwalise nzima ngokumthumela inhlamba ebulenjini kuFacebook.
Kulicala phansi komthetho wePost and Telecommunication Services Act ukuthi umuntu athumele omunye inhlamba ikakhulu esebenzisa ucingo.
UMlevu yena umangalele uMalandu ngenyanga ezisanda kwedlula esithi wamthelela igciwane leHIV, okulicala uMalandu alilandulayo. Uphinde wamangalela njalo uNcube icala lokumthethisa.
Kuviki edluleyo uMalandu laye umangalele emapholiseni esithi uMlevu laye umthethisile ngakho ufuna abotshwe.
Kodwa uthi okumangalisayo yikuthi lalamhla lokhu amapholisa kakathathi manyathelo njalo nxa ewabuza ukuba kungani amtshela ukubana udaba lwakhe lulezombusazwe phakathi.
UMlevu yena ulandule kungxoxo ayenze leStudio 7 ukuthi uke wathumela uMalandu inhlamba.
