amalinks wokungena

Breaking News

UMnu Shamu Uthi Kasoze Aguqule IBoard Yezokusakaza


Umphathintambo obona ngokwethulwa kwemibiko uMnu Webster Shamu uthi kasoze abumbe kutsha i-board yomsakazo weZimbabwe Broadcasting Corporation leyeBroadcasting Authority of Zimbabwe lanxa iMDC iqina ngokuthi lokhu kumele kwenziwe.

Ekhuluma ngoLwesithathu emkhosini wokunikeza iZBC imota ezintsha ePockets Hill, uMnu Shamu uthe amaboard womabili akhethwa ngokusemthethweni, ngakho kasoze edilizwa.

Inhloko kahulumende uMnu Morgan Tsvangirai wethule amazwi kumaviki edluleyo esithi uvumelene loMongameli Mugabe ukuthi uShamu ekhethe amaboard la kakutsha. Kodwa uShamu uthe lokho akusoze kwenzeke.

Ingxwethi kwezokwethulwa kwembiko uMnu Zenzele Ndebele yena ofundisa izifundo zokuthatshwa kwezindaba ekolitshini leNUST koBulawayo utshele iStudio 7 ukuthi imbiko kaShamu iveza sobala ukuthi ibandla leZanu PF alizimiselanga ukuthukulula amagagasi.

Kunjalo nje, abantu abafika phose inkulungwane babuthene koBulawayo becebisana ngokuthi kuyini okungenziwa ukuze kube lemisakazo ezimeleyo elizweni.

Umhlangano lo uqoqwe yiRadio Dialogue yona esileminyaka elitshumi izama ukuthola imvumo yokusakaza kodwa uhulumende engayivumeli.

Ekhuluma emhlanganweni lo, umkhokheli wenhlanganiso yeVoluntary Media Council uMnu Takura Zhangazha uthe abantu kumele baqalise ukusebenzisa omakhalekhukwini ukuze babambane emkhankasweni wokukhululwa kwamagagasi elizweni.

UMnu Kudzai Kwangwari oweRadio Dialogue uthe ukungaphatheki kweBroadcasting Authority of Zimbabwe emhlanganweni lo lanxa ibinxusiwe kuveza sobala ukuthi ayizimiselanga ukuthukulula amagagazi.

XS
SM
MD
LG