Umkhokheli wenhlanganiso yabasakhulayo eye Youth Advocacy for Reform and Development, uMnu. Themba Mliswa ukhululwe esitokisini kulandela ukubotshwa ngeSonto eSigodini esetheswa icala lokwenza umhlangano ongavunyelwanga ngamapholisa.
UMliswa uzamele abuyele njalo emthethwandaba ngenyanga ka Ncwabakazi.
UMliswa ubikwa ubesesitolo okuthengiswa ukudla elamalunga enhlanganiso yakhe angamatshumi amabili lane lapho ababotshwe khona. Kodwa amanye amalunga enhlanganiso yakhe akhululwa kwavalelwa yena.
Kodwa umthethwandaba uthe akhululiwe engakhuphanga imali yesibambiso, ibail. Sixoxe legqwetha lakhe, uMnu. Lizwe Jamela ukuze sizwe okunengi ngaloludaba.
UJamela uthi: "Abanye abangamatshumi amabili lane bakhululwe kwathiwa uMliswa asale ngoba nguye owayebize lumhlangano besithi wayengazisanga amapholisa njengalokho okutshiwo ngumthetho we POSA."
Kulomfanekiso kamabonakude otshengisa uMliswa ephoselana aqatha lokhansila wesigaba lesi kodwa UJamela uthi lokhu akukho emaphepheni emthethwandaba.
