Obengumgcinisihlalo wolunye ugatsha lwe MDC ekhokhelwa nguMnumnzana Tsvangirai kwele South Africa uMnumnzana Remember Moyo akasekho. Imfa kaMoyo obhubhe lamhlanje emini, ilandela ekaMnumnzana Jimmy Mhlanga laye owayekhokhela olunye ugatsha lwe MDC-T eJohannesburg yena obhubhe ngeNsonto ntambama.
Imfa kaMoyo kanye loMhlanga isitshiye abasekeli be MDC-T eJohannesburg belesithuli.
UMoyo ubelokhu engena ephuma esibhedlela kusukela ngoNhlolanja lonyaka ehlutshwa yisifo sofuba. UMoyo uthwetshulwe yingwe ngo 1969. Uqale ukungena kwezombusazwe ngesikhathi kuqoqwa ukubunjwa ibandla le MDC.
Ngo 2001 uMoyo ndawonye laboMnumnzana Khethani Sibanda, Sazini Mpofu, Fletcher Dulini Ncube lo Army Zulu, bavalelwa besetheswa icala lokubulala umgcinisihlalo weZANU PF koBulawayo umuyi uMnumzana Cain Nkala.
