amalinks wokungena

Breaking News

Umongameli Mnangagwa Ukhuthazwa Ukuqinisa Umsebenzi Wokulwisana leNkohlakalo eZimbabwe


Umongameli Emmerson Mnangagwa

Abenhlanganiso ezisebenzisana lozulu kanye lengcwethi ezicubungula ezombusazwe bakhuthaza uMongameli Emmerson Mnangagwa ukuba azimisele ukuqinisa umsebenzi wokulwisana lenkohlakalo elizweni, hatshi ukube ekhuluma nje ngomlomo.

Uhulumende laye ukhuthazwa ukuba atshiyane lomkhuba wokuvala abantu amehlo ngokubopha abaphatheka kunkohlakalo abakhululwa masinya icala lingayanga landawo.

Umongameli Mnangagwa wethule umbiko emkhosini wokunanza usuku oluqakathekisa ukuqedwa kwenkohlakalo ezwekazi labensundu olwe Africa Anti Corruption Day esola inkohlakalo eselizweni.

Isikhulumeli senhlanganiso yeCrisis in Zimbabwe Coalition, umnumzana Marvelous Khumalo, uthi akaqali uMnangagwa ukukhuluma kanje kodwa kungekho akwenzayo ukuqeda udubo lwenkhohlakalo.

“Siyabona ukuthi uhulumende wethu nguhulumende olamanga kakhulu. Khathesi into eqakathekileyo kakhulu yikulungisa indaba ye economy yelizwe. Siyabona khathesi ukuthi i socio-economic situation eyiselizweni lapha yiyo into eqakathekileyo kakhulu khathesi.”

Ingcwethi kwezomnotho esebenza izimele umnumzana Masimba Kuchera, uthi umongameli Mnangagwa wathembisa uzulu ngesikhathi ethatha intambo zombuso ngomnyaka ka 2017 ukuba wayezolwisana lenkohlakalo lapho exotsha amalunga eboard yeZimbabwe Anti-Corruption Commission kodwa kuze kube lamuhla akukho okubonakalayo osethe wakwenza.

“Kumele uhulumende abe more transparent njalo kumele abe more consistent kuma policies akhe ukuze sengqabele udubo esikhangelane lalo khathesi. Ngoba nxa uhulumende engaqhubeka ngendlela asebenza ngayo khathesi, sizaba lodubo olukhulu olokuthi lathi maZimbabweans sizabona ubunzima sibili.”

Umqondisi wohlangothi lwezokukhulumisana kuZanu Pf umnumzana Tafadzwa Mugwadi, uthi uhulumende kaMnangagwa ulwisana layo imisebenzi yenkohlakalo yikho enye inkokheli kahulumende eyaziwayo isitholakala ilamacala enkohlakalo emithethwandaba.

“Umkhokheli we Zanu Pf onguye njalo umongameli welizwe uyakhokhela kwezokulwisana lenkohlakalo elizweni thina silandela ngamuva kwakhe. Nguye ofuqa kakhulu ekubotshweni kwamanye amalunga ebandla lethu abengathintwa lanxa kwakusaziwa ukuba babephatheka kundaba zenkohlakalo, ezinye zake zindaba kungezadalwa ngesikhathi sonmbuso ka Robert Mugabe, kukhangelwa ukuthi uvela kuliphi ibandla lezombusazwe ukuntu. Kumbe ukuthi ngowaliphi ibandla lezokholo lokuthi uvela kuyiphi inyanga, kasikukhangeli lokho thina.”

Selokhu wangenayo esikhundleni uMnangagwa kulabaphathintambo ababalisa uPriscah Mupfumira, uObadiah Moyo labanye abagoqela ababengabaphathintambo ngesikhathi uMugabe ebusa abanjengo Ignatius Chombo, Samuel Undenge labanye asebatholakala belamacala enkohlakalo emithethwandaba.

Umgcinisihlalo wekomishini eye Zimbabwe Anti-Corruption Commission, uJustice Loice Matanda-Moyo, uthi imithethwandaba kumele isekelwe ngokwaneleyo ukuze iphe izigwebo ezingengqabela ukudalwa kwamacala enkohlakalo elizweni.

Abenhlanganiso ye Transparence International bathi eleZimbabwe lilahlekelwa yimali eyedlula ibhiliyoni yinye yamadola akweleMelika minyaka yonke ngenxa yemisebenzi yenkohlakalo.

Facebook Forum

XS
SM
MD
LG