Abaphathintambo beMDC ekhokhelwa nguMnu Morgan Tsvangirai abakhethwe ngoLwesithathu bafungiswe nguMongameli Robert Mugabe ukuqala umsebenzi ngoLwesine.
Abafungisiweyo laba bagoqela obona ngokuthuthukiswa kwenotho uMnu Tapiwa Mashakada lobona ngokwenzakala ewofisini kaMnu Tsvangirai uMnu Jameson Timba.
UMugabe ufungise njalo abasekeli babaphathintambo bengatsha ezitshiyeneyo abathathu abathi uMnu Obert Gutu, uMnu Gift Chimanikire loMnu Tongai Matutu.
UTsvangirai labasekeli bakhe abathi uMnu Arthur Mutambara loNkosazana Thokozani Khupe labo bebekhona emkhosini wokufungiswa kwabahlanu laba.
UMnu Tsvangirai uguqule uluhlu lwakhe lwabaphathintambo ngoLwesitahthu esithi ujonge ukuqinisa indlela ibandla lakhe elisebenza ngayo kuhulumende.
Inengi lithi lijabule kakhulu ngokufungiswa kwabaphathintambo laba kungazange kube lokudonselana phakathi kweMDC leZanu PF njengokuvame ukwenzakala.
Ukuhlaziya udaba lolu uNtungamili Nkomo weStudio 7 uxhume ingcwethi ecubungula ezombusazwe uMnu Rejoice Ngwenya yena othi kaboni ukuqoqwa kakutsha kwabaphathintambo kuguqula lutho kuhulumende.
