amalinks wokungena

UJacob Zuma Wala Ukuveza Indlela uGrace Mugabe Anikwa Ngayo iDiplomatic Immunity

  • Bennedict Nhlapho

UMongameli Robert Mugabe lomkakhe uGrace Mugabe.

Umongameli wakwele South Africa, uMnumnzana Jacob Zuma, walile ngoLwesine ukutshela amalunga edale lephalamende ukuthi yindaba uhulumende wakhe wapha uNkosikazi Grace Mugabe isivikelo sokuthi angabotshwa ngemva kokutshaya owesifazana wakwele South Africa. UZuma utshele amalunga ephalamende ukuthi akasazi isizatho ngoba yena akasilogqwetha.

Amalunga edale le phalamande yakweleSouth Africa abefuna ukwazi ukuthi yindaba uhulumende wapha uNkosikazi Mugabe isivikelo sokuthi angabotshwa kanti ngokomthetho wayengelaso leso sivikelo ngesikhathi etshaya uNkosazana Gabriella Engels.

Oqale ukwethula lo umbuzo lilunga le Inkatha Freedom Party unkosikazi Liezl Van Der Marwe kodwa umongameli Zuma wawutshaya indiva umbuzo wakhe waphendula okuseceleni.

Laphake kusukume umkhokheli webandla leDemocratic Alliance, uMnu. Mmusi Maimane, uthe uZuma akaphendule ukuthi kungani uhulumende wephula umthetho ngokupha isivikelo lesi kunkosikazi Mugabe.

“Wasithola kanjani isivikelo se diplomatic immunity uGrace Mugabe. Lasebenzisani ukumupha lesi sivikelo. Lo ngumbuzo olula. Weza la, watshaya owesifazana wakwele South Africa, khathesi sifuna ukwazi ukuthi kungani uhulumende weSouth Africa wamekela wahamba ngobuqili bokuthi ulesi vikelo seDiplomatic immunity.”

Lobanje kwaba segcekeni ukuthi amapholisa amiswa ukuqhubekela phambili ngokubopha unkosikazi Mugabe ngoba sekuthiwa loludaba selungenelwe lugatsha olubona ngobudlelwano be South Africa lamanye amazwe, uZuma uphe impendulo etshiye amalunga ephalamende ezonde eganunwabu.

“Ngodaba lukankosikazi Mugabe, mina angisilo gqwetha. Angiwazi umthetho njalo angizange ngiphatheke kulesi sinqumo. Ngingaqamba amanga nxa ngingachaza ukuthi kwahamba njani ngoba angizange ngibe yingxenye yogatsha olwathatha lesi sinqumo.”

Elinye ilunga lephalamende, uMnu. Tloyama uvele wasukuma wakubeka kwacaca ukuthi uZuma uyamesaba umongameli Mugabe yikho bakhulula unkosikazi Mugabe.

“Mongameli sokufanele manje sivume ukuthi iqiniso alisekho kuhulumende wakho. Yini ungavumi ukuthi uyamesaba uMongameli Mugabe, ngenxa yalokho umkakhe angatshaya loba ngubani eSouth Africa.Mongameli kanti vele sikuholiselani, ngoba usuvule ilizwe lethu ukuthi abantu bazenzele umathanda.”

Lakulo umbuzo uMongameli Zuma akazange athande ukuveza isiszatho.

“Angisilogqwetha. Angikwazi okwenzakalayo. Angingeke ngiqambe amanga. Yindaba usithi iqiniso selingibalekele ngoba ngikhuluma iqiniso. Yini uhlupho lwakho.’

Ingcitshi kwezomthetho zithi kusobala ukuthi uhulumende weleSouth Africa akalaso esinye isizatho esisekela isivikelo esaphiwa unkosikazi Mugabe ngaphandle kokuthi wayehlose ukugcina ubudlelwano beSouth Africa leZimbabwe.

Facebook Forum

XS
SM
MD
LG