Umsakazo owe Voice of America-VOA, osakaza ngendimi ezedlula amatshumi amane emhlabeni jikelele, umanyane lezinye inhlanganiso zezindaba zomhlaba ekunanzeni ilanga lokuqakathekiswa komsebenzi wokwethulwa kwezindaba lemibiko ngokukhululekileyo, ele World Press Freedom Day.
Unkosikazi Amanda Benett umqondisi we VOA wethule amazwi okunanza leli langa echasisa ukuthi inkululeko yokwethulwa kwezindaba imunyethwe lakusisekelo sombuso welizwe leMelika, ngakhoke bona njengomsakazo oweVOA bayaqakathekisa umsebenzi wenthathelizindaba ukuba zisebenze zikhululekile.
“Lapha eMelika siqakathekisa ukusebenza kwentathelizindaba zikhululekile okumunyethwe lakusisekelo sombuso welizwe. Ngoba nxa kungela nkululeko yentathelizindaba kutsho ukuba kuyabe kungela ndlela yokuba uzulu athole imibiko lolwazi lokuzikhethela umbuso wentando kazulu. Lokhu kusobala kubohulumende abayintando kayiphikiswa abathi kungaba lokhetho olulempumela ephikiswayo bavimbe ukusabalala kwemibiko, loba ukwethulwa kwezindaba. Bayakwazi ukuthi ukwethulwa kwemibiko ezindabeni kulamandla okuvula amehlo kazulu akhethe ukuthi uthatha nyathelo bani ngakhoke kabafuni ukuthi lawo mandla abe sezandleni likazulu.”
Ngamazwi akhe embikweni awethule ukunanza ilanga le World Press Freedom Day, uAmanda uthe “Okuqakathekileyo okumele kunanzelwe zintathelizindaba yikungeyameli cele nxa lapho zithapha izindaba lokwethulwa kwazo. Kumele intathelizindaba ikhulume lamacele wonke asedabeni, nxa ingenelisanga ukukhuluma lelinye icele kumele kudingwe ezinye indlela zokungabe kukhulunywe ngaphambilini ngombono walelo cele ukuze kulinganiswe amathuba edabeni”