amalinks wokungena

Breaking News

Umsekeli WeZanu PF Ugwetshwa Ngecala Lokudlwengula Ilunga LeMDC


Amacele womabili eMDC athi ajabule kakhulu ngokugwetshwa komunye umsekeli weZanu PF eMasvingo ukuba apike okweminyaka engamatshumi amabili ngecala lokudlwengula umsekeli weMDC kudlakela olubekhona ngo2008.

UMnu Gilbert Mavhenyengwa, ongomunye wabalwa impi yenkululeko ubikwa wangenela umsekeli weMDC lo ebusuku wamhluthuna ezandleni zomkakhe andubana emdlwengule.

Emveki kwalokho, wamnikela kubasekeli beZanu PF ukuba bamtshaye. Icala ayelifela ngelokuthi wayengumsekeli weMDC.

Iphephandaba leNewsDay libike ukuba esethula isinqumo sakhe ngoMvulo, umantshi uEsther Muremba uchaze uMuvhenyengwa njengesidlova.

Isikhulumeli seMDC ekhokhelwa nguMnu Welshmann Ncube, uMnu Nhlanhla Dube utshele iStudio 7 ukuthi bayasamukela isigwebo esethulelwe uMavhenyengwa.

Amazwi kaDube agcizelelwe ngumsekeli wesikhulumeli seMDC ekhokhelwa nguMnu Morgan Tsvangirai uNkosazana Thabitha Khumalo.

Kodwa umkhokheli weZanu PF edale lephalamande uMnu Joram Gumbo uthe udaba lolu alulani lezombusazwe, esithi uMavhenyengwa yisigebenga esimele sijeziswe.

XS
SM
MD
LG