amalinks wokungena

Breaking News

Umthethwandaba Usekela Amakhosikazi Abantu Abasebenza eHwange Colliery Abangatholi Iholo Ngemfanelo


Izisebenzi zeHwange Colliery sezileminyaka emihlanu zingatholi iholo.
Izisebenzi zeHwange Colliery sezileminyaka emihlanu zingatholi iholo.

Idale leHigh Court selilahlele khatshana udaba lwenkampani yamalahle eye Hwange Colliery Company ebidinga ukuxotsha ngokuphangisa kwabatshengisela duze lamahofisini ale inkampani bedinga ukuba inkokheli yenkampani ilungisise izikhalazo zabo ezigoqela ukuhlawulwa imali esileminyaka bengayitholi.

Amakhosikazi abantu abasebenze kunkampani le, asebetshengisele okwensuku ezedlula inyanga eHwange, athi idale lomthethwandaba litshengise ukuzwisisa ubuhlungu bezisebenzi ngokubanikeza imvumo yokuqhubeka betshengisela inkampani le ize ilungisise izikhalazo zabo.

UNkosikazi Amari Sawulo, omunye wamakhosikazi ezisebenzi zale inkampani, uthi kuyathokozisa ukubona umthethwandaba ubasekela edabeni lwabo ngakho-ke sebecela uhulumende abancedise njengoba amadoda abo seleminyaka emihlanu engaholi.

Umkhokheli wenhlanganiso yezisebenzi eye Zimbabwe Congress of Trade Unions (ZCTU), uMnu. Peter Mutasa, uthe ukunqoba abakwenze edale lomthethwandaba kutsho okunengi kwabalwisana labaninibhizimusi abangaholisi izisebenzi.

Inengi lezisebenzi zeHwange Colliery Company sezileminyaka emihlanu zingaholanga, abaholayo bahola imali ephansi kulaleyo abayivumelana lenkampani le emba amalahle.

UNkosikazi Sibonisiwe Ndlovu, owayesebenza eHwange, uthe isikhathi sesifikile sokuthi linkampani ibaphathe njengabantu, ngoba uhlupho lokungaholi solubangele ubuyanga lemikhuhlane eza ngokungaziphathi kwabantu asebedinga ukuphilisa imuli zabo ikakhulu omama.

Igqwetha lamakhosikazi la, uMnu. Munyaradzi Gwisai, uthe okwenzakale ngoLwesibili kumele kunikeze amadlabuzane ezinye izisebenzi ezilodubo lunye okuya emthethwandaba ukuze bathole uncedo lokulungisisa indingeko zabo.

UNkosikazi Tendai Sithole, elinye njalo ikhosikazi lesinye isisebenzi seHawange, uthi udaba lolu solumele luthathelwe amanyatheolo ngokuphangisa lungakabulali imizi yabo.

Abantu abanengi batshayele amakhosikazi la ihlombe besithi ukubambana kumqoka ekwethulweni kwezikhalazo ngalizwi linye okufana lokwenzakale edabeni lwamakombi ngeviki edluleyo lapho abantu bemanyene bakhonona ngelizwi linye kwahle kwaguqulwa ukwaliswa kokungena kwamakombi enzikini yedolobho leHarare.

Amakhosikazi la asebehlonitshwa ngalokhu asebekwenzile, sebelenyanga behlala etendeni duzane lamahofisi eHwange betshengisela njalo behambisa izikhalazo zabo mihla yonke. Bathe abasoze besuke iHwange Colliery Company ize ibanike imali zabo njengoba kungasaphileki.

Udaba Esilethulelwe NguGibson Bhebhe
please wait

No media source currently available

0:00 0:03:56 0:00

XS
SM
MD
LG