Unduna Negomo oweChiweshe esigabeni seMashonaland Central, usephiwe imvumo lidale likamantshi ukuba athumele isithunywa somthethwandaba siyebamba impahla yenhloko kahulumende uMnu Morgan Tsvangirai.
Lokhu kulandela ukwehluleka kukaMnu Tsvangirai ukuhlawula isigwebo asiphiwe yilinduna ngemva kokuba imthole elecala lokulobola ngenyanga kaLwezi, okuyinto ezilayo esikweni lesiShona.
Ekupheleni komnyaka odluleyo uNegomo uhlale idale wathonisa uMnu Tsvangirai ngecala lokulobola uNkosazana loCadia Karimatsenga Tembo ngoLwezi.
Lanxa uTsvangirai eyale ukuyazivikela edale likaNegomo, induna le ithethe icala lakhe engekho yamgweba ukuthi ahlawule inkomo ezimbili, izimvu ezimbili, ilembu elimhlophe kanye legwayi lamakhala.
UNegomo uphe uTsvangirai inyanga ukuthi abe sehlawule isigwebo sakhe, kodwa uTsvangirai kazange azihluphe ngoba esithi uNegomo kalawo amandla okumthonisa.
Uyakulandula njalo ukuthi wamlobola uKarimatsenga.
Umthethwandaba kamantshi eBindura umvumele uNegomo ukuthi abambe impahla kaTsvangirai njengoba esala ukuhlawula isigwebo sakhe.
Umsekeli wesikhulumi seMDC ekhokhelwa nguye uTsvangirai, uNkosazana Thabitha Khumalo uthi uNegomo usetshenziswa yiZanu PF ukuhlukuluza umkhokheli webandla lakhe.
Igqwetha uMnu Matshobana Ncube uthi lanxa evumelana lamagqwetha kaTsvangirai ekuthini uNegomo ubengelawo amandla okuthonisa udaba lolu, uthi uTsvangirai uphambanisile ngokungayi emthethwandaba ayephikisa isinqumo sikaNegomo.
