amalinks wokungena

Mugabe: Bangamagovu Abalwa Impi Yenkululeko Abafuna Izikhundla kuZanu PF

  • Mavis Gama

UMongameli Robert Mugabe uthi abalwa impi yenkululeko bangamagovu ngoba sebefuna izikhundla kubandla leZanu PF ngamehlo abomvu.

Ekhuluma emathuneni amaqhawe eNational Heroes Acre eHarare ngoLwesithathu ngesikhathi kungcwatshwa umuyi uBrigadier General James Jotham Murozvi, uMugabe uthe akumelanga abalwa impi yenkululeko bekwenze lokhu ngenxa yokuthi ibandla leZanu PF lilendlela elikhetha ngayo inkokheli.

UMugabe uhluphana labalwa impi yenkululeko abathi kabasoze bemsekele kukhetho lukamongameli oluzakwenziwa ngomnyaka ozayo.

Amapholisa ake abagijimisa ezitaladini eHarare ngesikhathi befuna ukutshengisela besola okwenzakala kubandla leZanu PF.

UMugabe uphinde watshela umphakathi ukuthi akumelanga kubelokuxokozela kubandla lakhe lapho okulabantu abanengi abakhanya bafuna ukumbangisa isikhundla.

Lanxa uzulu engazange eze ngobunengi, abekhona amaqembu atshiyeneyo abelibazisa uzulu, kusalindelwe ukufika kwesidumbu sikamuyi uBrigadier General Murozvi, siphelekezelwa nguMongameli Mugabe.

UMugabe, uchaze umuyi njengomuntu owayezithobile, engela mawala kusukela esempini kuze kube manje etshona.

UBrigadier-General Douglas Nyikayaramba, owasebenza lomuyi uBrigadier General Murozvi, uthe iZimbabwe ilahlekelwe ngumuntu obezinikele ukuthuthukisa ilizwe.

Umuyi, obhubhe eseleminyaka engamatshumi ayisithupha yokuzalwa, utshiye unkosikazi, uRetired Group Captain Joyce Murozvi, laye owalwa impi yenkululeko, ingane ezine labazukulu ababili.

Abaphathintambo benhlangothi zikahulumende, iziphathamandla emawofisini kahulumende, inkokheli yebutho lenhlangothi zonke zomvikela kanye lozulu, baze ukuzavalelisana loMurozvi.

Kade bekhona labalwa impi yenkululeko abagoqela, uMnu. Christopher Mutsvangwa, lomkakhe uNkosikazi uMonica Mutsvangwa, lonobhala jikelele wenhlanganiso yabalwa impi yenkululeko, uMnu. Victor Matemadanda.

Facebook Forum

XS
SM
MD
LG