Ibandla leZanu PF lithi lizacela iAfrican Union emhlanganweni wayo oqala ngeSonto eAddis Ababa kweleEthiopia ukuthi ivumele iZimbabwe yenze ukhetho lonyaka lanxa kungela sisekelo sombuso esitsha.
Lelibandla lithi indaba yokulotshwa kwesisekelo sombuso esitsha ikhanya isehlula ngoba abeMDC sebetshengise ukuthi abazimiselanga ukubona lesi sisekelo siqedwa ukulotshwa ngokuphangisa ukuze kwenziwe ukhetho.
IZanu PF ithi ikhuthaza njalo iAU ukuthi ingalaleli izikhalazo zeMDC labenhlanganiso ezizimeleyo abalande lumhlangano besiyakhalaza ngodaba lweZimbabwe.
Isikhulumeli salelibandla uMnu Rugare Gumbo uthi uMongameli Mugabe uzakhulumisana labakhokheli bamazwe eAfrica kulumhlangano edinga usekelo lokuthi iZanu PF iqhubekele phambili ngokhetho.
Isikhulumeli seMDC ekhokhelwa nguMnu Welshman Ncube, uMnu Nhlanhla Dube uthi imizamo yeZanu PF le ayisoze iphumelele.
