amalinks wokungena

Breaking News

UMugabe Ukhankasela Usekelo eMaNdebeleni


UMugabe lemuli yakhe.

Isikhathi sokhetho kwele Zimbabwe sivame ukuba yisikhathi sezithembiso lokwethuselana njalo inkokheli zamabandla atshiyeneyo seziqalile ukudinga usekelo lwabantu.

UMongameli Robert Mugabe ngomunye oseqalile ukubhoda amagumbi amane elizwe njalo ngoLwesihlanu ubese Lupane njalo kulemibiko ethi umongameli webandla elikhulu eliphikisayo ele MDC-T laye usendleleni uyeza kwelemaNdebeleni ukuzodinga usekelo.

Kambe kungani lezinkokheli zibangisana ukuza kulumhlubulo welizwe njalo bona abahlali balindawo nzuzo bani abazayithola ngokuvakatshelwa lokhu.

USibonakaliso Ndlovu uthi akakuboni okubi ngokubuya kwenkokheli le ukuzokhankasa kwele MaNdebeleni ukuzodinga usekelo.

Nxa kuvele kuzakuba khona ukhetho abantu kumele bekhankase njalo wena muntu sekukuwe ukuba ulalela ziphi izithembiso lokuba uzahamba uyevotela bani.

UBekezela Sibanda, umama oleminyaka yokuzalwa engamatshumi amane, uthi yena uke wavota kanye kuphela ngesikhathi esekhaya kibo ePlumtree njalo uyajabula ukuba ukhetho lomnyaka ozayo luzamthola ehlala edolobheni lako Bulawayo lapho azabe ekhuselekile ngoba ekhaya isikhathi esokhetho singekho mnandi.

Imikhankaso yabezombusazwe kwele Zimbabwe nxa kuzakuba lokhetho ivame ukuhambisana lodlakela njalo uMaSibanda uthi okuza engqondweni yakhe yindlela ababethwele nzima ngayo ngesikhathi sokhetho esahlala emaphandleni.

Babehamba besibuza ukuba sivotela liphi ibandla njalo wena muntu ngokwesaba ubususithi uvotela iZanu PF ngoba usesaba ukutshiselwa umuzi.

Untombazana osakhulayo uSakhile Moyo uthi yena vele akazingeni ezombusazwe vele ubengakwazi lokuthi uMongameli uMugabe ubeseLupane namhla.

"Kahle kahle kimi kuyafana ukusekela amabandla ezombusazwe ngoba akuntshintshi lutho ngiyabe ngibona lokhe kufana nje."

Ubaba uEdson Ndimande uthi yena vele ukhathele ngezombusazwe njalo akalalo ithemba kunkokheli yabantu abansundu ngoba besehluleka ukubusa.

Thina sibuswe ngabelungu babekwazi ukubusa, asizange simbone uSmith ephapha nsuku zonke esiyale lale. Bona bahamba lenqumbi yabantu.

UMongameli uMugabe kanye lo Tsvangirai yibo abalabalandeli abanengi kwezombusazwe kodwa bakhona abagoqela abakebaba yingxenye kahulumende ababalisa, uMnumzana uNkosana Moyo, kanye lo Nkosikazi Joice Mujuru labo abakhankasela ukukhokhela ilizwe leZimbabwe njalo labo asebeke bafika kwele maNdebeleni bezodinga usekelo.

Facebook Forum

XS
SM
MD
LG