amalinks wokungena

Breaking News

UMugabe Ukhuthaza Amalunga Edale lePhalamende Ukuthi Ahlolwe Igciwane LeHIV


UMongameli Mugabe ukhuthaze amalunga edale lephalamende kanye leziphathamandla zikahulumende ukuthi bakhokhele imizamo yokulwisana lomkhuhlane wengculaza ngokuhlolwa igazi kanye lokwazisa uzulu ukuthi balawo yini kumbe hatshi lumkhuhlane.

Emazwini awethule ngoLwesine ekusungulweni kohlelo lweZimbabwe Parliamentarians Against HIV/Aids, uMugabe uthe sebebanengi asebenze labo kuhulumende lakubandla lakhe asebelahlekelwe yimpilo bebulawa ngumkhuhlane wengculaza.

Uhlelo lolu lujonge ukukhuthaza amalunga edale lephalamende ukulwisana lokumemetheka kwegciwane leHIV.

UMugabe ukhuthaze amalunga edale kanye lozulu ukuthi bazinikele ukuyahlolwa igazi ukuze bahlale bekwazi ukuthi balalo yini igciwane kumbe hatshi, okuyinto engancedisa kakhulu ekwenqabeleni ukumemetheka kwaleligciwane.

Umgcinisihlalo weZimbabwe Parliamentarians Against HIV/Aids, engummeli weKwekwe Central edale uMnu Blessing Chebundo uthe kulamalunga ephalamende amakhulu phose amabili-175 asevume ukuba yingxenye yaloluhlelo. Idale leli lona lilamalunga angamakhulu amathathu.

Ukuhlaziya amazwi kaMugabe sixhume owake waba ngummeli weNkayi edale uMnu Abednico Bhebhe lolwela ilungelo labaphila legciwane leHIV uMnu Dumisani Nkomo.

Ababili laba bathi ngempela imizamo yokulwisana leHIV kumele ikhokhelwe ngamalunga edale lephalamende.

XS
SM
MD
LG