UMongameli Robert Mugabe ubekhangelelwe ukufika kweleCuba ngoLwesibili elanda ukuyakhalela uzulu walelolizwe ngokubhubha kukaMnu Fidel Castro ngoMgqibelo.
UCastro waba nguMongameli weCuba kusukela ngo1959 eze egunqule uhulumende owayekhona ngaleso sikhathi wazosuka esikhundleni ngomnyaka ka2008 esetshiyela umfowabo uMnu Raul Castro.
Ubengumuntu ohlonitshwayo kakhulu emazweni asathuthukayo ezwekazi leAfrica leLatin America ngoba wawaphathisa kakhulu empini yokuthola uzibuse.
EleZimbabwe leleCuba ngamazwe alobudlelwano obuhle kakhulu obusukela ngesikhathi ilizwe lilwela inkululeko.
Zinengi njalo izizalwane zeZimbabwe ezafundela imisebenzi etshiyeneyo kweleCuba egoqela ukuba ngumbalisi labodokotela.
Imizamo yokukhulumisana lommeli weZimbabwe kweleCuba uMnu Ignatias Mudzimba yehlule.
Kodwa sixhume ingcwethi kwezombusazwe uMnu Nkululeko Sibanda yena othi uCastro utshiye imbali eqakathekileyo emazweni amanengi asathuthukayo kanye lobudlelwano obuhle.
"UCastro ubengaqakathekanga kangako kuzwe leZimbabwe lizimele lodwa kodwa nxa ukhangele eleZimbabwe njengelinye lamazwe asathuthukayo, uCastro ubeqakathekile kakhulu," kutsho uSibanda.
