Umanyano weSouthern African Development Community (Sadc) usunxuse abakhokheli bamabandla akuhulumende womanyano ukuthi baphatheke emhlanganweni wawo ozaqhutshelwa kwele Namibia oqala ngeSonto.
UMongameli Mugabe, uMnu Morgan Tsvangirai kanye loMnu Arthur Mutambara bakhangelelwe ukuba khona emhlanganweni lo, wona ozahlaziya ukudonselana okukhona kuhulumende wabo lokungagcwaliswa kwesivumelwani seGlobal Political Agreement.
Umhlangano lo uzahluza njalo ukuthathelwa kwabalimi abamhlophe amapulazi abo, lokungalandelwa kwezinqumo zeSadc Tribunal nguhulumende weZimbabwe phezu kodaba lwamapulazi.
Umhlangano lo uza ngesikhathi uMongameli Jacob Zuma wele South Africa ephakathi kokukhulumisana loMugabe, uTsvangirai loMutambara ngokudonselana okukhona kuhulumende womanyano.
UZuma ukhangelelwe ukwazisa umhlangano lo ukuthi imizamo yakhe yokulungisisa udaba lweZimbabwe sifike kuliphi ibanga.
Ingcwethi ecubungula ezombusazwe uMnu George Mkhwanazi utshele uNtungamili Nkomo weStudio 7 ukuthi ukuze udaba lweZimbabwe lulungisiswe kumele iSadc iphathe uMugabe ngesandla esilukhuni.
