amalinks wokungena

UKhama weBotswana Kasoze Enze Idili Elikhulu Lokuzalwa Elifanana Lelika Mugabe

  • Martin Ngwenya

UMnu. Ian Khama loMnu. Robert Mugabe.

UMongameli Robert Mugabe wazalwa mhlaka 21 Nhlolanja 1924 kwathi ngemva kweminyaka engamatshumi amabili lasitshiyagololunye, mhlaka 27 Nhlolanja 1953, kwazalwa uMongameli Ian Khama owabelethelwa kwele Bhilithani.

Kuyonale iviki, uMugabe ulungiselela ukuthakazelela ilanga lakhe lokuzalwa eRhodes Estate Preparatory School (REPS) ngaphandle kwakoBulawayo, lapho okubikwa izikhamizi azilali zizama ukuncedisa ukuthi indawo ibukeke.

Sokulethwe kanye lemitshina yokulungisa imigwaqo kukanti izakhamizi zibikwa zikhiphe inkomo kanye lemali. Idili lonke lizakudla izigidi ezimbili lengxenye yamadola eMelika (i$2.5million).

Lokhu kuchothozwe ngabanye abafana loMnunzana Dumi Ncube oseGaborone othe konke lokhu ukugida kuyenzakala ngesikhathi abanye beZimbabwe belala ngendlala.

“Kambe ngeqiniso kungathi ilizwe liphakathi kwendlala engaka umuntu oyedwa asebenzise imali engaka ukunanza ilanga lakhe lokuzalwa.”

Kukanti ngaphetsheya komfula uRamokgwebana, eBotswana, lapho inengi elilala lidlile njalo umumo womnotho unganeno, akula dili elikhona ngesikhathi uMongameli Khama ethakazelela ilanga lakhe lokuzalw.

“Siyake sibone umongameli Khama evakatshela noma izibotshwa ngelanga lakhe lokuzalwa, esidla nje ikhekhe kanye lokudla kwemini okungayi ngaphi. Kazidubi ngokuchitha izigidi lezigidi.”

Kukanti omunye weBotswana, uMnu. Joel Serema, uthi bona bayathakazelela indlela umongameli wabo oyenza ngayo engachithi imali kumadili.

“Yikho esikukhangeleleyo kumkhokheli ongachithi imali kumadili afana lokunanza ilanga lakhe lokuzalwa.”

Langakucele lezombusazwe, uMongameli Mugabe lo Mongameli Khama ngamanzi lamafutha. UMugabe usebuse iZimbabwe iminyaka engamatshumi amathathu lasikhombisa kukanti uKhama wangena esihlalweni ngomnyaka ka2008.

UKhama ulungiselela ukwehla esihlwalweni ngomnyaka ozayo, enikeza umsekeli wakhe, uMnu. Mokgweetsi Masisi, intambo.

Kukanti nga kwelinye icele, uMugabe, oyenelisa iminyaka engamatshumi ayisitshiyagalolunye lantathu (93), ulungiselela ukumela ibandla lakhe leZANU PF kukhetho lomnyaka ozayo.

Facebook Forum

XS
SM
MD
LG