UMongameli Robert Mugabe usefikile kwele South Africa ngesikhathi uNkosikazi Grace Mugabe ekhangelane lokubotshwa ngamapholisa ngecala lokutshaya owesifanaza wakwele South Africa amnthole elabantwabakhe abangabafana ewoteleni abahlala kuyo eJohannesburg.
Iqula labatshutshisi abazimeleyo enhlanganisweni elwela amalungelo eye Africa Forum, litshaya phansi ngenduku lisithi uNkosikazi Mugabe uzabotshwa.
UMugabe ubekhangelelwe ukufika kweleSouth Africa ngolweSihlanu esiza emhlanganweni weSouthern African Development Community (SADC) kodwa ucine efika masinyane ukuzohlenga umkakhe obhekane lokubotshwa ngamapholisa.
Owesifazana wakwele South Africa, uGabriella Engels, uvulele uNkosikazi Grace Mugabe icala ngemva kokuba emtshaye wavuleka induma ekhanda ngesikhathi emthola elabantwabakhe uRobert Junior lo Bellarmine Chatunga ewoteleni abahlala kuyo eJohannesurg.
Umama ka Gabriella, uNkosazana Debbie Engels, utshaya phansi ngentonga esithi ufuna uNkosikazi Mugabe ayevalelwa entilongweni ngesihluku asenze umtanakhe.
“Ngithukuthele kakhulu kakhulu. Aluba bengisenelisa ukumbamba ngezami izandla lezi uNkosikazi Mugabe, ngiqedelane laye bengizakwenza lokhu. Khathesi loludaba ngilutshiya ezandleni zamapholisa.”
Kodwa ugatsha olubona ngobudlelwano beSouth Africa lamanye amazwe luthi soluthole isicelo kuhulumende weZimbabwe ukuthi uNkosikazi Mugabe avikelwe phansi kwesivumelwano seziphathamandla zikahulumende ezethekelela amanye amazwe ngephasiporti ethi zimele uhulmende.
Kodwa-ke isiphathamandla sebandla leDemocratic Alliance, uMnu. Stevens Mokgalapa, uthi uNkosikazi Mugabe akekho ngaphansi kwalesi sivikelo.
“Ungene elizweni esebenzisa iphasipoti esetshenziswa ngumuntu wonke hatshile alayo evikela abathunywe nguhulumende. Ngalokho akekho phansi kwelesi sivikelo. Bekuvele kufanele ahle abotshwe ngemva kokudala leli cala. Amapholisa aluphathe butshapha loludaba seluze ludala ingxabano phakathi kwamazwe omabili.”
Kusenjalo, inhlanganiso elwela amalungelo eye Afriforum, elegqwetha elaziwayo kakhulu kwele South Africa uMnu. Gerrie Nel, itshele abezindaba ukuthi isibhalele uhulumende weSouth Africa imcebisa ukuthi akukho emthethweni ukupha uNkosikazi Mugabe isivikelo leso kodwa kufanele abotshwe ayemiswa emthethwandaba.
UNel uthi uNkosikazi Mugabe angaphiwa isivikelo bazagijima besiya emthethwandaba ukuyasikhipha leso sivikelo ukuze abotshwe.
“Sizakwenza konke okufunekayo okuzakwenza ukuba ajeziswe. Sikhangelele ukuthi kusiyaphela inyanga ezintathu esethonisisiwe, kumbe esethathelwe amanyathelo.”
Sokulokwesabela ukuthi uhulumende uzakwekela uNkosikazi Mugabe aphume elizweni okuzakwenza ukuthi loba esebuya abuye esesebenzisa iphasipothi elomvikela wabamele uhulumende okuzenza ukuthi angasabotshwa.
Kodwa umphathintambo wogatsha lwezamapholisa, uMnu. Fikile Mbalula, uthi ngeke ayendawo uhulumende aze atsho ukuthi kwenziweni ngaye.
“Besekukudala siqaphile emgceleni ukuze angaphumi elizweni. Sekuvaliwe emingceleni, iziphathamandla zemingceleni sezitsheliwe ukuthi angaphumi kanti laye akusimuntu okhombisa ukuthi uzabaleka.”
Inhlanganiso yeAfriroum layo ithi izenza konke ekwenelisayo ukuthi angaphumi elizweni engamiswanga emthethwandaba ngaleli cala, kodwa nxa engaphuma, loba nini la azangena khona kuleli uzavalelwa ayethonisizwa.