amalinks wokungena

UMujuru Uxotsha uGumbo, uMutasa Labanye Ebandleni Lakhe

  • Ntungamili Nkomo

Umkhokheli webandla leZimbabwe People First (ZimPF) uNkosikazi Joyce Mujuru sexotshe abantu abayisikhombisa ebandleni lakhe abagoqela uMnu Rugare Gumbo loMnu Didymus Mutasa esithi basetshenziswa libandla leZanu PF.

Abanye babaxotshiweyo babalisa uMnu Kudakwashe Bhasikiti, uMunacho Mutezo, uLuckson Kandemiri, uCloudious Makova loNkosikazi Margaret Dongo.

Ekhuluma lentathelizindaba, uNkosikazi Mujuru uthe ukubone kufanele ukuthi axotshe abantu laba ngoba bebengasebenzi kuhle labanye njalo bebephikisa konke okwenziwa libandla.

Ngalokho, uthe bebephazamisa kakhulu ingqubelaphambili yebandla lakhe.

Ubethese njalo umlandu wokuzama ukumgenqula esikhundleni, okulicala uMujuru ngokwakhe alixotshelwa kubandla leZanu PF.

“Ingqondo zabo bezikhanya zisemuva kuZanu njalo okwesibili ukusebenza kwabo ungani ngabantu abalenjongo, abathinyiweyo ukuzosigwenxa,” kutsho umsekeli wesikhulumeli seZimPF uMnu Methuseli Moyo.

Kodwa uGumbo labanye bakhe bakulandule konke lokhu besithi lokhe bengamalunga ebandla leli. Uthi uMujuru kalawo amandla okubaxotsha ngoba yibo abalisungulayo njalo njalo bamkhetha ukuthi alikhokhele.

Ingcwethi kwezombusazwe uMnu Nkululeko Sibanda utshele umsakazo weStudio 7 ukuthi ukuxotshwa kwabantu laba kulakho ukuphazamisa inkulumo zomanyano wamabandla aphikisayo.

“Lokhu kwenza kube nzima kunkulumo ngoba uMujuru usuke waxotsha bonke abaphethe izikhundla eziphezulu kubandla lakhe. Singazi ukuthi ukuqina kwebandla lakhe kuzaqhubeka kusiya ngaphi,” kutsho uMnu Sibanda.

Facebook Forum

XS
SM
MD
LG