Umphathintambo obona ngendaba zezisebenzi zikahulumende, uNkosikazi Prisca Mupfumira, ngoMvulo ucunule abantu abanengi ngenkuthazo yakhe yokuthi uzulu kumele ethokoze ngoba ilizwe seliphumile ebunzimeni elike laba kibo.
UMupfumira wethule amazwe la embikweni wakhe wokunanza ilanga lentokozo elahlelwa yiUnited Nations eleInternational Day of Happiness.
Ilanga leli linanzwa emhlabeni jikelele minyaka yonke mhlaka 20 ngenyanga kaMbimbitho.
Kodwa uzulu weZimbabwe usole uMupfumira esithi akula lutho lokuthakazelela nanku akulamisebenzi elizweni njalo abanengi badla luklubhu ngenxa yombuso weZanu PF omubi.
Umsekeli wesikhulumeli sebandla leMDC-T, uNkosazana Thabitha Khumalo, ngomunye wabasole uMupfumira esithi kahloniphi uzulu othwaliswe nzima ngumbuso kaMongameli Mugabe.
“Kuyamangalisa ukuthi uMupfumira ukhuluma amazwi anje yena esehluleka ukubhadala izisebenzi zikahulumende ama-bonus azo anyakenye,” kutsho uMaKhumalo.
