UNkosikazi Rita Nyampinga loNkosazana Stabile Dewa babotshwe ngenyanga edluleyo besetheswa icala lokufuna ukugenqula uhulumende. Idale lithi ababili laba kumele bahlawule inkulungwane eyodwa yamaRTGS iRTGS$1,000, baye emapholiseni nsuku zonke, bangahluphani labafakazi bakahulumende.
Ababili laba babotshelwe enkundleni yendizamtshina eye Robert Gabriel Mugabe International Airport bevela kwele Maldives emhlanganweni lapho ababikwa babeyefundiswa indlela zokugenqula uhulumende kaMongameli Emmerson Mnangagwa ngabenhlanganiso yeCenter for Applied Non-Violent Action Strategies yakwele Serbia.
Lokhu kwenzakala ngemva kokuba beke besala bevalelwe ngemva kokukhululwa ngesibambiso sebail kwabanye babo abahlanu NgoLwesine lweviki edluleyo.
UNyampinda ungumqondisi wenhlanganiso emela amalungelo abesifazane abasemajele, eye Female Prisoners Support Trust, kuthi uDewa engumqondisi we Women Academy for Leadership and Political Excellency.
Ingcwethi kwezombusazwe umnumzana Mlungisi Moyo uthi ukhathazekile kakhulu ngokubotshwa kwabalwela amalungelo oluntu.
Ukubotshwa okade bekwenziwe kuyinto edanisayo kakhulu ikakhulu nxa sikhangele ukuthi siphila ku new dispensation njalo nxa sinanzelela ukuthi eskhathini esinengi akula cala elibambekayo eliyabe liyenziwe yilaba abantu kuyadanisa sibili kusitshengisa ukuthi laba ababusayo yibo ababenceindezela abantu ngesikhathi iska Mugabe njalo sekukhangelele ukuthi yinto ezabangcolisa emhlabeni wonke jikelele nxa sesikhangela indaba zamalungelo oluntu
Umnumzana Charles Nyoni ingcwethi ecubungula ezombusazwe uthi ukubotshwa kwabalwela amalungelo oluntu sekumele kulwiswe emithethwandaba.
Ukubotshwa okwenziwa abantu abalwela amalungelo abantu eZimbabwe kusitshengisa okusegcekeni ukuthi uhulumende kaMnangagwa uzimisele nje ukuncindezela njalo ukuvala indawo yokuthi abalwela amalungelo oluntu basebenzele kuyo. Njalo uhulumende lo ulomona owedlula owayekhona okaMugabe ngobva lo uzimisele ukubulala abantwana bakazulu lokucitha igazi vele akadondi , vele akacabangi kabili ngakho. Lokhu kusitshela ukuthi uhulumende lo akumelanga simnikeze ithuba lokuthi aze acine avalile indawo yokuthi sisebenzele kuyo, kumele simlwise ngandlela ziphi laziphi zonke esingazikwaniusa sisebenzisa umthetho ngoba singekela ukwenza njalo kuyacina sekusaliswa ukukhuluma nje,”
U Lungile Nkiwane oyintathelizindaba uthi uhulumende sokumele ahlale phansi akhulumisane labenhlanganiso zamalungelo oluntu bavumelane iziqondiso zokulawula ukusebenza kwazo.
Ngendlela into ezihamba ngayo lapha eZimbabwe sekumele uhulumende afake iframework eyokuthi abamela ilungelo labantu, babone ukuthi basenze njani, besuka ngaphi besiya ngaphi, ngoba ngendlela okuyikho ngeyokuthi nxa sebesenza imisebenzi yabo ngendlela eqondile uhulumende usuka ebone angane usenyathelwe amazwane. Siyakhuthaza ukuthi uHulumende afake iframework ezalandisa indlela okumele basebenze ngayo
Kodwa abanye bathi uhulumende engabe eqondile nxa ehlola indlela lezi nhlanganiso ezisebenza ngayo ngoba ehlose ukuvikela uzulu.
Unkosikazi Velaphi Ncube isakhamuzi sase Harare uthi uhulumende uqondile nxa ehlolisisa indlela lezi nhlanganiso ezisebenza ngayo ngoba ekuqaleni komnyaka kalabezinye inhlanganiso ezilwela amalungelo oluntu eziphatheke kudlakela olucine lusiba lomonakalo wokubhidlizwa kwempahla elizweni.
Mina ngibona angani nxa uhulumende ehlolisisa inhlanganiso zalabo abalwela amalungelo moluntu wenza kuhle ngoba lokhu kungabe kuyindlela yokuvikela uzulu ngoba akwaziwa ukuthi abantu laba nxa bephuma ngaphandle kwelizwe bayakwenzani, ngakho ke akumelanga kusolwe lokhu okwenziwa nguhulumende,”
Lokhu kungezwani phakathi kukahulumende labenhalnganiso ezilwela amalungelo oluntu kuza ngesikhathi isimo elizweni siqhubeka sisiba sibi ngamandla kubangelwe yikuqonga kwentengo yemphahla lokudla ezitolo.
Lokhu kufuthelana elizweni sekwengezelelwe yikwethuselwa kwamabandla aphikisayo, ngokukhuthaza ukutshengisela phezu kokubhidlika komnotho welizwe, uhulumende kaMongameli Emmerson Mnangagwa engathathi amanyathelo akhanyawo okulungisisa lesi simo.
