amalinks wokungena

Breaking News

UNkosikazi Obama Ucela Uzulu Ukuthi Avotele Umkakhe


Democratic National Convention: Michelle Obama
Umhlangano webandla lamaDemocrats oqale ngoLwesibili eMelika uyaqhubeka ngoLwesithathu kukhangelele ukuthi owake waba nguMongameli walelilizwe uMnu Bill Clinton ethule amazwi okukhuthaza uzulu ukuthi avotele uMongameli Barack Obama ambuyisele esihlalweni.

UMnu Clinton waba nguMongameli weMelika ngo1993 wazotshiya isikhundla ngo2001 isikhathi sakhe sokubusa sesanele.

UMongameli Obama uzancintisana lomela ibandla lamaRepublicans uMnu Mitt Romney kukhetho oluzakwenziwa ngoLwezi lonyaka.

Abakhulume kulumhlangano ngoLwesithathu bathe bazavotela uObama ngoba engumkhokheli olohlonzi ukwedlula uMnu Romney.

Omunye wabakhulume kulumhlangano ngumeya wedolobho leSan Antonio uMnu Julian Castro, yena obonwa njengomuntu olekusasa elihle kakhulu kwezombusazwe.

Kodwa isikhulumi esimqoka bekunguNkosikazi Michelle Obama yena okhuthaze uzulu ukuthi avotele umkakhe ngoba inhlelo zikahulumende wakhe zithuthukisa umnotho lozulu jikelele.

UNkosikazi Obama utshayele umkakhe ihlombe ngokusungula umthetho wezempilakahle iAffordable Health Care Act.

Umgcinisihlalo weMDC ekhokhelwa nguMnu Morgan Tsvangirai eMelika uMnu Den Moyo uthi uthokoze kakhulu ngamazwi kankosikazi Obama.
XS
SM
MD
LG