Isikhonzi seUnited Nations esibona ngezamalungelo oluntu uNkosikazi Navi Pillay uhlangane loMongameli Robert Mugabe eHarare ngoLwesithathu wamkhuthaza ukuthi aqede lonke udlakela ngaphambilini kokhetho oluzayo.
NgoLwesibili uNkosikazi Pillay uhlangane lenhloko kahulumende uMnu Morgan Tsvangirai kanye lenhlanganiso ezizimeleyo bekhulumisana ngodaba lokulondolozwa kwamalungelo oluntu elizweni.
UPillay utshele intathelizindaba ngemva kokuhlangana loMugabe ukuthi umxwayise ikakhulu edabeni lodlakela kanye lokwephulwa kwamalungelo oluntu.
Wengeze wathi udlakela kumele luqedwe ukwenzela ukuthi ukhetho oluzayo luqhutshwe ngokukhululekileyo njalo ngokusuthisayo.
Ngemva kokubonana loMugabe uPillay wethekelele epulazini likaNkosikazi Grace Mugabe eMazowe, iPanashe Farm. Ngaphambilini, ubeke wahlangana labalimi abaphiwa umhlabathi phansi kohlelo lweLand Reform.
UNkosikazi Pillay ufike elizweni ngeSonto ukuzecubungula umumo wamalungelo oluntu njalo ukhangelelwe ukugqiba uhambo lwakhe ngoLwesihlanu.
