Umthethwandaba kaMantshi weHarare unqume ngoLwesibili, usipha uFrank Chikowore lo Samuel Takawira, imvumo yokuhlawula isibambiso sebheyili.
Intathelizindaba lezi zombili, ezisebenza zizimele zetheswa umlandu wokungalaleli amapholisa lapho zethekelele esibhedlela se Parktown eHarare, lapho okwelatshwa khona inkokheli yabatsha eyeMDC Alliance eyayithunjiwe zizama ukukhulumisana layo.
UChikowore lo Takawira babotshwe ngoLwesihlanu lweviki ephelileyo, bamiswa phambi komthethwandaba kaMantshi ngoMqgibelo lapho abalelwe ukuhlawula isibambiso ukuze bathoniswe besuka emakhaya okwenze bavalelwa impelaviki yonke ebigoqela ikhefu leAfrica Day izolo.
Namhlanje babuye edale likaMantshi eMbare, befakwe izankosi enyaweni kodwa intathelizindaba ezizimeleyo ezigoqela eze Studio 7 zalelwe ukungena edale ngezizatho ezingachasiswanga ngabomthetho.
Iqgwetha labo uMnu Paidamoyo Saurombe wazise ukuba ababili laba baphiwe imvumo yokuhlawula amakhulu amahlanu amadola eZimbabwe-RTG$500 ngamunye. Banikezwe imigoqo yokuthi bengahluphani labafakazi bakahulumende, bahlale ezindlini zabo njalo bayezibika enkambeni yamapholisa kanye ngeviki.
Idale liphinde lathi uhulumende wehlulekile ukupha ubufakazi obuqinileyo bokuthi kungani ababili laba kumele bayalelwe ukuhlawula ibheyili.
USaurombe uthe kuyadanisa ukuba intathelizindaba lezi zibotshwe ziqhuba umsebenzi wazo zingephuli mthetho esithi kuqakathekile ukuthi intathelizindaba zisebenze zikhululekile zingahlukunyezwa ngabomthetho ngoba lohulumende watsho ukuba umsebenzi wazo ukuhlangothi oluqakathekileyo ngalesi sikhathi ilizwe likuLockdown yokulwisana lokuthelelanwa lula kwegcikwane leCovid 19.