amalinks wokungena

Breaking News

Usencitshiwe Okwesibili Imvumo Yokuhlawula Ibheyili uNgarivhume


Transform Zimbabwe president Jacob Ngarivhume

UMantshi uTrainos Utahwashe uncitshe umongameli webandla le Transform Zimbabwe uMnu Jacob Ngarivhume imvumo yokuhlawula isibambiso sebheyili, ukuze athoniswe evela emzini wakhe. Lokhu kutshiye abantu abanengi bemangele ukuba kuyini okungabe kusenzakala ngokwephulwa kwamalungelo akhe oluntu.

UNgarivhume obotshwe langa linye lentathelizindaba elodumo, uHopewell Chin’ono, usefikise inyanga eyodwa lokhe wabotshwayo esetheswa icala lokufuna ukugenqula uhulumende, ngokusungula umkhankaso wokukhuthaza uzulu ukuthi angene ezithaladeni etshengisela ekhonona ngokonakala kwesimo somnotho elizweni kubangela yinkohlakalo esibhahile eZimbabwe, ikakhulu kuziphathamandla zikahulumende.

Isicelo sakhe sakuqala esebheyile siyaliwe lidale likaMantshi, amagwetha akhe asesikhweza emthethwandaba waphezulu oweHigh Court wona owasiyalayo usithi kumele sibuyele edale likaMantshi ngoba singahambelani lezizatho ayezibotshelwe.

Igqwetha lika Ngarivhume uMnu Moses Nkomo uveze ukudana okukhulu ngendlela alelwe ngayo lesi sicelo ngu Mantshi.

“Sesiphume edale njalo. UJacob usencitshiwe imvumo yokuthoniswa esuka ngekhaya kungelani lokuba idale besiluphe imbangela ezintsha zokuba aphiwe ibheyili. Bathi kakulakuguquka kubhangela eyenza ukuba abotshwe”

Umthethwandaba uNkomo uthi ubatshele ukuba kulobufakazi obuqinileyo bokuthi uNgarivhume ngempela ufuna ukugenqula uhulumende.

“Idale livumile ukuba umhlaka 31 Ntulikazi wabakhona njalo akula okwenzakalayo, basuke bathi okwakumele kube yikutshengisela sekuliqula Labantu abafuna ukukhipha uhulumende. Idale liphinde lathi uNgaruvhume nguye owasungula inhlanganiso eye 31st July Movement”

UNkomo uqhubeke ethi sebezaphindela njalo emthethwandaba waphezulu oweHigh Court bekhweza lesi sicelo sokuba uNgarivhume aphiwe imvumo yokuhlawula isibambiso sebheyile, ukuphikisa leso esethulwe nguMantshi. Idale linqume ukuba uNgarivhume aphenduka edale mhlaka 4 Mpandula.

Amagqwetha entathelizindaba u-Hopewell Chin’ono, obotshwe sikhathi sinye loNgarivhume njalo esetheswa cala linye, namhlanje ubesedale lapho laye akade elwisa ukuthi aphiwe imvumo yokuhlawula isibambiso sebheyili ake ayincitshwa kuqala, enikeza ingwalo okwathiwa lidale azilethe andubana isicelo sakhe sahlulelwe. Owahlulela edabeni lukaChin’ono uMantshi Ngoni Nduna uthe uzakupha isinqumo sakhe ngoMvulo.

Kulonye udaba ibandla le MDC Alliance litshele intathelizindaba ukuba umsekeli ka mgcinisihlalo webandla leli uMnu Job Sikhala ubotshiwe kodwa akukacaci ukuba qetheswa cala bani.

USikhala ngomunye walabo abaqanjwa ngamapholisa ukuba babelungiselela ukutshengisela okwakumele kwenzakale mhlaka 31 Ntulikazi. Imizamo yokukhuluma lesikhulumeli samapholisa u Assistant Commissioner Paul Nyathi yehlule.

Ukubotshwa kukaChin’ono loNgarivhume labanye abalwela amalungelo oluntu kusolwa ngabenhlangothi zonke zempilo hatshi eZimbabwe kuphela kodwa lasemazweni womhlaba abathi ukuqansa kwezehlakalo zokuhlukunyezwa lokwephulwa kwelungelo loluntu elizweni kuyethusa. Ngokunjalo sekuphuma inkuthazo yokuthi inhlanganiso ezinjengeSADC, African Union lezinye ukuba zingenele edabeni lweZimbabwe.

Ngakwelakhe icele uhulumende uma ngelokuthi akulankinga eZimbabwe ngakho akula sidingekho sokuthi udaba lolu luhlaziye emihlanganweni yenhlanganiso ezinjegeSADC, AU loba kuUnited Nations. Uma njalo ngelokuthi inkinga ezibhekane lelizwe ngezibangelwa yizijeziso zomnotho ezafakelwa iziphathamandla zikahulumende lezeZanu PF.

Udaba Esilethulwe NguMlondolozi Ndlovu
please wait

No media source currently available

0:00 0:03:43 0:00


Facebook Forum

XS
SM
MD
LG