amalinks wokungena

Breaking News

UTrump loBiden Bangqikilene Njalo Kunkulumompikiswano Yokucina Phambilini Kokhetho


Trump and Biden face off in final presiden

UMongameli weMelika uMnu Donald Trump kanye lancintisana laye uMnu Joe Biden baqhube ingxoxompikiswano yabo yokucina izolo lapho abachasisela uzulu inhlelo abazamenzela zona nxa benganqoba kukhetho oluzakwenziwa mhlaka 3 ngenyanga ezayo.

Ababili laba batshukane phezu kwendikimba ezigoqela abake babhuqana ngazo kunkulumompikiswano yakuqala ezifana lodaba lomkhuhlane weCovid-19, ukuvikeleka kwenhlelo zokhetho ezitheni zeMelika, ezempilakale, ezomkhuthi kanye lodaba lokubandlululwa kwabantu abamnyama.

Ingxokompikiswano le ibiyehlukene kakhulu leyakuqala ngoba ababili laba bebengathukani njalo bengavimbani ukukhuluma.

UTrump loBiden baqale ukukhuluma ngeCovid-19 uTrump esithi kumele kuvulwe ilizwe njalo ethembisa ukuthi umuthi wokwelapha lumkhuhlane ususeduzane.

Kodwa uBiden usole uTrump esithi wehlulekile ukuvikela uzulu kulumkhuhlane, wona osubulele izizalwane zeMelika ezedlula 228,000.

Bakhulume njalo ngodaba lwabokuza eMelika olweImmigration, uBiden ethembisa ukuthi engakhethwa uzatholisa amaphepha abantu abedlula i11 million abaseMelika ngaphandle komtetho.

“Ngingakhethwa ngizaphuma lohlelo phakathi kwamalanga alikhulu, olujonge ukutholisa abantu abedlula izigidi ezilitshumi lanye, amaphela okuhlala kuleli,” kutsho uMnu Biden.

“Labo abaphansi kohlelo lweDACA labo sizaqhelisa amaphepha abo ukuze bathole ithuba lokuba yizizalwane zeMelika. Ukubaxotsha okwenziwa nguTrump yikubabuyisela emazweni abangawaziyo.”

UMongameli Trump yena uchothoze uBiden esithi ukufuna ukuvula imingcele yelizwe kungene lezigebengu.

Wengeze wathi ngesikhathi uBiden esasembusweni engumsekeli kaMongameli Barack Obama, behluleka ukululungisa loludaba.

“Uhlelo lokubopha lokukhulula abantu abangelamaphepha luyingxabangxoza. Ababulali babengena kuleli, obhinya labo bebengena kuleli, abantu abangalunganga bebengena eMelika babanjwe bakhululwe amapholisa athi azabalanda,” kutsho uTrump.

“Abaphansi kwe 1 percent kuphela yibo ekade betholakala. Besithumela abe-border patrol ukuthi bayebadinga kodwa bengatholakali.”

Bekhuluma ngokubandlululwa kwabantu abamnyana, uMongameli Trump uthe kakhethi abantu ngombala njalo uthe kunengi asekwenzele abantu abansundu.

“Akulamuntu osephathise abantu abamnyama ukwedlula mina ngaphandle mhlawumbe kukaAbraham Lincoln. Akulamuntu osenze engikwenzileyo okufana le-criminal justice reform,” kutsho uTrump.

“UObama loBiden kabazange bakwenze lokho. Ngaguqula ukubotshwa mahlayana kwabantu abansundu ngisebenza loSenator Tim Scott."

UBiden uwaphikisile amazwi kaTrump esithi ulobandlululo. Uthe yena ulohlelo lokuthuthukisa abansundu enganqoba.

“Kumele sibaphathise ngenhlelo zokuzithuthukisa lokuthi bathole amathuba amahle kwezemfundo, kwezempilakahle, ukuthola imali yokusungula amabhizimusi. Kunengi okumele sikwenze njalo ngilohlelo olucacileyo olupha abantu ithuba lokuzithuthukisa,” kuchaze uMnu Biden.

Ababili laba batshukane njalo ngodaba lomnotho lokusilela kwemisebenzi, uBiden esithi engakhethwa ufuna isisebenzi esihola imali ephansi sithole i$15 ngehola. Kodwa uTrump uthe lokho uzakutshiya ezandlnei zabaqhatshi lezezabelo.

Izizalwane zeZimbabwe ezibukele ingxoxompikiswano le zithe ihambe kuhle kakhulu ukwedlula ingxabangxoza yakuqala.

“Ngibona abantu bakaTrump bazajabula ukuthi uzamile ukuziphatha, kutshukuthi bamkhuzile. Ngakolunye uhlangothi uBiden laye uqhubeke egxile kunhlelo zakhe,” kutsho isizalwane seZimbabwe esihlala eVirginia, uMnu Den Moyo, ongusopolitiki.

Amazwi kaMoyo agcizelelwe ngomunye njalo usopolitiki uMnu Tim Muringai, oyisizalwane seZimbabwe eshlala eOhio yena othi amacele womabili ajabulile ngendlela uTrump loBiden abaqhube ngayo.

Kodwa uthe kaboni bekhona abantu abazavota abalakho ukuguqula umqondo ngabakuzwileyo kulingxoxompikiswano.

“AmaRepublicans azavotela uTrump, siyakwazi lokho. AmaDemocrats lawo azavotela uJoe Biden. Ekade sebekwenza khathesi yikulwela amaIndependents. Kodwa ngibona angani uBiden ule-advantage,” kutsho uMnu Muringayi.

Kulabantu abafika phose izigidi ezingamatshumi amahlanu, 47.1 million asebevotile ngaphambilini kwelanga lokhetho mhlaka 3 ngoba izabelo ezinengi zikuvumela lokhu.

please wait

No media source currently available

0:00 0:05:07 0:00

Facebook Forum

XS
SM
MD
LG