amalinks wokungena

UTrump Uthi Uhlelo lweGreen Card Lottery Kumele Luvalwe

  • Ntungamili Nkomo

US Lottery Green Card

UMongameli weMelika, uMnu. Donald Trump, uthi usethatha amanyathelo okuvala uhlelo lweDiversity Visa Lottery Program, kulandela ukubulawa kwabantu abayisitshiyagalombili eNew York ngoLwesibili ngowesilisa odabuka kweleUzbekistan.

Owesilisa lo, ogama lakhe nguSayfullo Saipov, ubikwa waphiwa imvumo yokuhlala eMelika ngemva kokuthola iGreen Card phansi kohlelo lweDiversity Visa Lottery Program lolu.

Uhlelo lolu lusetshenziswa ngabantu abanengi ukuthola imvumo yokuyahlala eMelika. Sikhuluma nje luvuliwe njalo inengi lizama inhlanhla.

Emazwini awethule ngoLwesithathu, uMnu. Trump, yena odume ngokukhuluma kubi ngabantu bokuza, uthe uhlelo lolu kumele luvalwe emizameni yokwenqabela izigelekeqe ezifana loSaipov ukuza eMelika.

USaipov ubulale abantu laba ngokubagxoba ngemota ngabomo njalo ulimaze abantu abedlula itshumi. Ubikwa njalo ebethwele imbobho yamanga engadubuliyo.

Amapholisa amdubule amlimaza njalo athi kulobufakazi bokuthi ngumsekeli weqembu labalwa becatsha abesiMoslem abedlulise amalawulo abeISIS.

Ukuhlaziya amazwi kaMnu. Trump sixhume umgcinisihlalo weMDC eMelika uMnu. Den Moyo yena othi kuyadanisa ukuthi umsolwa usedalele abantu abanengi udubo.

Facebook Forum

XS
SM
MD
LG