amalinks wokungena

Breaking News

UTsvangirai Ubeliqhawe, Kutsho Uzulu leMDC-T


Uzulu weZimbabwe kanye leziphathamandla zebandla leMDC-T sebeveze ukudana ngokubhubha kukaMnu Morgan Tsvangirai besithi ilizwe lilahlekelwe kakhulu.

UTsvangirai ufele esibhedlela kweleSouth Africa ngoLwesithathu lapho ekade eselatshwa khona umkhuhlane wemvukuzane ohlasela ithumbu elikhulu, icolon cancer.

Ubeseleminyaka yokuzalwa engamatshumi ayisithupha lanhlanu, 65.

Morgan Tsvangirai
Morgan Tsvangirai

Omunye wabasekeli bakaTsvangirai uMnu Elias Mudzuri uthe bawisa ezimathonsi ngokutshona komkhokheli wabo.

“Ngilokudana ngokwazisa uzulu ngokutshona kukababa uTsvangirai. Ubeliqhawe ebelilwela umbuso okhululekileyo eZimbabwe,” kutsho uMudzuri.

Umgcinisihlalo weMDC-T uMnu Lovemnore Moyo yena uchaze umufi njengomuntu obelesibindi njalo obelenhliziyo ende.

“Umuyi ubengumuntu olokubekezela okakhulu nxa esebenza labantu njalo ubengumuntu obelothando kubasekeli bebandla,” kutsho uMoyo.

“Ubehlanganiso abantu njalo bekusithi nxa kulokwehlukana kwemibono ubebuya lamacebo okuletha abantu ndawonye etsho ukuthi singakulungisisa njani okuhluphayo,” uqhubeke echasisa uMnu Moyo.

Umuyi uMnu Morgan Tsvangirai elomkakhe uNkosikazi Elizabeth Tsvangirai
Umuyi uMnu Morgan Tsvangirai elomkakhe uNkosikazi Elizabeth Tsvangirai

UTsvangirai utshiya ibandla lakhe lilokuxokozela okukhulu ngenxa yokulwisana okuphakathi kweziphathamandla zalo, uMnu Nelson Chamisa loMnu Elias Mudzuri bebanga isikhundla sakhe.

Inengi lithi leli bandla lilakho ukudabuka phakathi. Kodwa uMoyo utshele iStudio 7 ukuthi bazasebenza gadalala bekhumisane umlotha njengenkokheli.

“Angiboni ukuthi kungaba yikudilika kwebandla; sizazama ukuthi silethe abantu ndawonke bekhumisane umlotha nxa bekhona abalwayo,” kuthembise uMoyo.

Umkhokheli wenhlanganiso yeChristian Alliance uMnu Useni Sibanda yena uchaze uTsvangirai njengomuntu obehlonipheka kwezombusazwe elesithunzi esifana lesikamuyi uMnu Joshua Nkomo.

Abasekeli bebandla leMDC-T besemhlanganweni wokukhankasela ukhetho
Abasekeli bebandla leMDC-T besemhlanganweni wokukhankasela ukhetho

“Ubaba uTsvangirai sasebenza sonke kakahulu kumkhankaso weSave Zimbabwe Campaign. Abanengi siyakhumbula ukuthi wazimisela ukutshaywa ngamapholisa aze aphosa ambulala,” kutsho uSibanda.

Uduzuze imuli kaTsvangirai labo bonke abakhalayo ngombalo kaRomans 8: 28.

“Phakathi kokulahlekelwa okungaka ngiyakholwa ukuthi kukhona okuhle uNkulunkulu akulungisayo okuzaphuma. Ngiyakholwa njalo ukuthi umoya oyingcwethle uzaduduza wonke umuntu,” kutsho uSibanda, yena ongumfundisi njalo.

Facebook Forum

XS
SM
MD
LG