Umkhokheli weMDC-T, uMnu. Morgan Tsvangirai, ugqibe uhlelo lwakhe lokukhulumisana labasekeli bebandla lakhe ezabelweni zonke zelizwe ngomhlangano awenzele eChinhoyi ngoMvulo.
Injongo yemihlangano le ibingeyokudinga imbono yabasekeli bebandla leli phezu komanyana wamabandla aphikisayo ngaphambilini kokhetho lomnyaka ozayo.
UTsvangirai uzakwazisa amalunga eNational Executive yebandla lakhe ngoLwesine ukuthi bathini abasekeli ngodaba lolu.
Umqoqi wenhlelo zeMDC-T, uMnu. Abednico Bhebhe, utshele iStudio 7 ukuthi abasekeli bebandla bathi bayawufuna umanyano.
Kodwa bathi amanye amabandla aphikisayo kumele ekunanzelele njalo evume ukuthi ibandla likaTsvangirai yilo elilosekelo olunengi ukwedlula wonke amanye amabandla.
“Abantu bathi umanyano bayawufuna kodwa phela njengoba ibandla lethu selileminyaka engu17 lilwisana leZanu PF, bathi amanye amabandla kumele akunanzelele khonokho,” kutsho uBhebhe.
