Inhloko kahulumende njalo engumkhokheli welinye lamacele eMDC uMnu Morgan Tsvangirai uthi kaboni kusiba lokhetho olukhululekileyo elizweni nxa udlakela olukhona lungaqhubeka.
Ekhuluma lentathelizindaba eHarare ngoMvulo, uMnu Tsvangirai usole udlakela olubekhona eChitungwiza ngeSonto, olubangele ukumiswa komhlangano ekade emele awenze labasekeli bakhe.
Udlakela lolu luqhamuke ngemva kokuba abasakhulayo beZanu PF behlasele abasekeli beMDC ekade belanda umhlangano lo ngamatshe, kwalimala abantu abedlula amatshumi amahlanu.
IMDC ithi kubotshwe abasekeli bayo ababili phezu kwaloludlakela lanxa lubangelwe yiZanu PF.
UTsvangirai uthe uhlangane loMugabe ngoMvulo bakhulumisana ngodlakela bavumelana ukuba amabandla akuhulumende ahlangane ngoLwesihlanu phezu kwaloludaba.
Kodwa isikhulumeli seZanu PF uMnu Rugare Gumbo uthi iMDC yiyo eqale loludlakela.
Uthi abatsha bebandla lakhe bebemele babe lomdlalo wenguqu enkundleni yeChibuku lapho iMDC ebimele yenzele khona umhlangano wayo, okuyikho okubangele udlakela lolu.
UMnu Gumbo utshele iStudio 7 ukuthi iMDC yiyo eqale loludlakela ngoba ifuna ukuthola usizi kuqula likaMongameli Jacob Zuma weleSouth Africa eliselizweni okwamanje.
