amalinks wokungena

Breaking News

Tsvangirai: Amakhansila Angeke Akhetha uMeya Wodwa


Umkhokheli webandla le Movement for Democratic Change uMnu. Morgan Tsvangirai utshele okhansila, amalunga akhethwe ukungena ephalamende kanye lezakhamizi ukuthi ibandla leli alingeke litshiye umsebenzi wokukhethwa kukameya ezandleni zabokhansila kuphela ngoba amadolobho kuyiwo wodwa lapho ibandla elisele lilamandla okukhokhela khona.

UTsvangirai ubekhuluma labasekeli bebandla lakhe emhlanganweni owenzelwe eCity Hall koBulawayo ngoLwesine. Uthi amakhansili kumele asebenze kanzima ukuze atshengise ilizwe ukuthi lelibandla liyazi ukukhokhela ngoba selibuyele laba libandla eliphikisayo.

Uthi kudingeka ukuthi ibandla leli libe lokuzithoba kanye lokulalela lokhu okunqunywa yinkokheli ngoba kungenziwanga njalo akula kuphumelela okuzaba khona.

UTsvangirai wengeze esithi abasekeli bengalandeli bakholwe lokhu abakubala emaphaphendabeni athi ukhulumisana le Zanu PF ngoba yena le bandla lakhe bengasoze bancedise lelo bandla ukubhada uzulu ngodaka ngemva kobuqili elabenzayo kukhetho. Uthi njengoba lelibandla lisithi linqobile alibuse ke lekele ukuhlala limthuka.

Umgcinisihlalo wakobulawayo kulelibandla, uMnumzana Gorden Moyo, ubonge uzulu wakoBulawayo ngokukhetha lelibandla wathi akuhlehlwa nyovane kungaze kubenzima njani inguquko abayidingayo ize ifezeke.

Ukuza kukatsvangirai koBulawayo kwenzakala ngesikhathi kulokuxokozela phakathi kwabokhansila baleli dholobho ngokuthi umeya uzaba ngubani.

Lelibandla belithembise ukutsho ukuthi likhetha bani ngeviki ephelileyo kodwa kulokhu kungakenziwa lokhu.

IBulawayo yavotela bonke abammeli bephalamende abalitshumi lambili labokhansila bonke abangamatshumi amabili lasitshiyagalolunye – 29 bevela kubandla le MDC-T.
XS
SM
MD
LG