amalinks wokungena

Breaking News

UTsvangirai Uthi Kumele Kwenqatshelwe Udlakela


Inhloko kahulumende uMnu Morgan Tsvangirai secele inkokheli yamazwe abensundu eyezwekazi leAfrica ukuthi ingenele kudaba lweZimbabwe ngamandla ukuze kwenqatshelwe udlakela athi lungabakhona kukhetho oluzayo.

Ekhuluma eseNigeria ngoLwesithathu esethekelela uMongameli Goodluck Jonathan, uTsvangirai uthe iAfrican Union kumele incedisane leSadc kulungiswe udaba lweZimbabwe andubana kuyiwe kukhetho.

Uthe lokhu kumele kwenziwe ukuze kuvinjwe isimo esibe khona kweleIvory Coast lapho obephethe intambo zombuso anqotshwe khona kodwa walela esikhundleni kwacina sokusiba lodlakela kwafa inkulungwane lenkulungwane zabantu.

UTsvangirai utshele intathelizindaba esigodlweni iAbuja ukuthi ukulelo lizwe ukuyakwazisa uMongameli Jonathan ngokwenzakala eZimbabwe, emcela njalo ukuthi aphatheke mathupha ekulungisiseni udaba lolu.

Imbiko yakhe iza ngesikhathi iZimbabwe Peace Project isithi ukufuthelana kuqhubekela phambili kwezombusazwe lanxa udlakela lwehlile kancane.

Ukuhlaziya amazwi kaTsvangirai sixhume ingcwethi ecubungula ezombusazwe uMnu Effie Dlela Ncube yena othe ngempela udlakela lungaqhamuka yiloba nini eZimbabwe.

XS
SM
MD
LG