Amazwe atshiyeneyo ananze usuku lokukhumbula abantu abanyamalalayo ngoLwesithathu abalwela amalungelo oluntu eZimbabwe bechothoza uhulumende phezu kokunyamalala kwabantu abaphikisana laye.
Ilanga leInternational Day of the Victims of Enforced Disappearances lahlelwa ngumanyano weUnited Nations ngo2010 ngenjongo yokukhumbula abantu abanyamalalayo lokukhuthaza ohulumende ukuthi bahloniphe amalungelo alabo abaphikisana labo.
EZimbabwe banengi abantu abaphikisa umbuso kaMongameli Robert Mugabe lebandla lakhe leZanu PF asebelesikhathi benyamalale abafana loPatrick Nabanyama, uMnu. Paul Chizuze, uRashiwe Guzha loMnu. Itai Dzamara.
“Kusobala ukuthi uhulumende waseZimbabwe ulemithetho ayalayo ukuyilandela efana leqondane lokuqakathekiswa kwamalungelo oluntu,” kutsho igqwetha elilwela amalungelo oluntu njalo engumqondisi wenhlanganiso yamagqwetha iAbammeli, uMnu. Tineyi Mukwewa.
