Abakhokheli bamazwe omhlaba edlula ikhulu labenhlanganiso ezizimeleyo namuhla bazaphatheka emhlanganweni oqoqwe nguMongameli weMelika uMnu Joe Biden ngenjongo yokukhuthaza umbuso okhululekileyo emhlabeni jikelele.
Kodwa uMongameli Emmerson Mnangagwa kasoze abekhona ngoba kanxuswanga.
Umhlangano lo, obizwa ngokuthi yiSummit for Democracy, usungulwa namuhla ngoLwesine uphele ngoLwesihlanu njalo uzaqhutshelwa ngomabonakude omunye lomunye eselizweni lakhe ngenxa yomkhuhlane weCovid-19.
Amazwe akhelane leZimbabwe anxusiweyo agoqela eleBotswana, Malawi, DRC, Zambia, South Africa, Namibia, Angola, eleKenya lamanye amazwe omhlaba jikelele agoqela eleBhilithani, Australia leleNew Zealand.
Abasola umbuso weZanu PF bathi uMnangagwa kanxuswanga ngoba uhulumende wakhe esephula amalungelo oluntu kanti bathi eZimbabwe akulambuso okhululekileyo ohlonipha intando kazulu.
Lanxa kunjalo, akhona amazwe etheswa umlandu wokubusa ngodlame afana lelePakistan leleDRC anxusiweyo.
Khepha isikhulumeli sesigodlo sikaBiden, iWhite House, uJen Psaki utshele iVoice of America ukuthi ukunxuswa kulumhlangano akutsho ukuthi uhulumende weMelika uvumelana lokwenzakalayo kulelo lizwe.
Ilunga lebandla leMDC Alliance uMnu Edwin Ndlovu utshele iStudio 7 ukuthi akumangalisi ukutshiywa phandle kukaMnangagwa ngoba engumbusi omubi.
Kodwa ilunga leZanu PF uMnu Believe Gaule ukulandule lokho esithi uMnangagwa ubusa kuhle njalo uyawahlonipha amalungelo oluntu ngokugcweleyo.