amalinks wokungena

Kuvezwa Umthetho Wokuthola Izithupha zeBotswana

  • Martin Ngwenya

Map of Botswana, Africa

Ele Botswana selethule umthetho wokuthi abafuna ukuba lencwadi zokuba yizizalwane zamazwe amabili benelise ukwenza njalo ngemva kokwethula umthetho ovumela ukuthi abantu babelencwadi okuba yizazalwane emazweni amabili.

Idale lephalamende lakweleBotswana lisanda kuvumelana ukwethula umthetho ovumela abantu ukuthi benelise ukuba yizizalwane zelizwe abadabuka khona kanye leBotswana.

Umthetho lo uphume kulandela ukubona ukuthi abanye abeBotswana bendele kumbe bathathwe ngabantu bokuza, okwenza bethathe incwadi zokuhlala emazweni abomkabo.

Ngaphansi komthetho omutsha, abeBotswana abalamaphepha akwamanye amazwe abasoke belahlekelwe lilungelo lokuba yizizalwane zeBotswana.

Ngitsho labeZimbabwe abathethe kumbe bendele kuzizalwane zeBotswana, sebalakho ukuthola incwadi zeBotswana njalo bengcine ezelizwe labo lomdabu.

Esinye isiphathamandla kugatsha olubona ngabangena, ukuphuma kanye lokuhlala eBotswana, sitshele iStudio 7 ukuthi umthetho lo awuyenzelwanga abeBotswana kuphela, kodwa labantu bokuza.

Noma nje kungaba lithuba elihle ukuthi abanye beZimbabwe asebehlale isikhathi eside eBotswana, kumbe abalezimuli kulelizwe babe lamaphepha okuba lamalungelo ezizalwane zeBotswana, abanye bathi akusoke kubelula nje ukuthola amaphepha.

"Inkinga yikuthi umthetho lo uphuma ngesikhathi iBotswana iwomela lamaphepha. Angiboni kusiba lula ukuthi nje bathole icitizenship kweleBotswana noma belemuli. Abanye sikhuluma nje, kade bahlala njalo belemuli kodwa bathi akulula ukuthola amaphepha akhona."

Inengi labeZimbabwe eselihlale isikhathi eside eBotswana liyazama ukuthola amaphepha alelolizwe kodwa uhulumende uyala esithi ufuna labo abazaletha ulwazi olungekho kuzizalwane zakhe.

Kusenjalo, iBotswana ithi izaqhubeka iguqula imthetho yalabo abafuna ukusebenza lokuhlala elizweni. Idale lephalamende lisanda vumelana umthetho ozabona kubunjwa amakhomithi atshiyeneyo akhangela amaphepha abokuza ngokuthi bafuna umsebenzi kuluphi uhlangothi.

Okwakhathesi bekule khomithi eyodwa ekhangela incwadi zonke, kungakhethi uhlangothi lomsebenzi.

Facebook Forum

XS
SM
MD
LG