Izakhamizi zakoBulawayo lezesigaba seMaNdebeleni jikelele zemukele uluhlu lwendleko zikahulumende ezomnyaka ozayo ngembono ehlukeneyo kodwa inengi likhanya lingathakazeleli lolu luhlu.
Ekhuluma leStudio 7 ngemva kwamazwi kaMnu. Chinamasa, osakhulayo wakoBulawayo, uNkosazana Nozipho Moyo, uthe ibudget le imtshiye elemibuzo embalwa njalo kajabuli ngomthelo abakhangelelwe uwuyibhadala ngemva kokuthenga icard lokufona.
UMoyo uthe intengo ezahlawulwa ekuthengeni amafutha eparaffin izababuhlungu ebantwini abasemaphandleni labanye abasemadolobheni abangela mandla kagesti abasebenzisa umlilo.
UMoyo ulethemba lokuthi ugatsha lwezokhetho olwe Zimbabwe Electoral Commission luzayithola ngesikhathi imali abayithenjisiweyo.
UMnunzana Mthokozisi Nyoni, ohlala emaphandleni, uvumelane loMoyo esithi udaba lokuqansa kwentengo yeparaffin kuzakwenza bephilenzima.
UChinamasa ubike njalo ukuba imali yokhetho eyizigidi zamadola ezingamatshumi ayisificamunwe munye lane yiyo ezasebenza ngokhetho lomnyaka ka2017.
UNyoni uthe kuhle ukuthi uhulumende alungiselele masinya ukuze iZEC ingasweli imali ngoba ihlala ikhala ngokusilela kwemali.
UNyoni ubelokudana ngendlela uChinamasa athulise ngakhona ngemthelo wezisebenzi lokuthi bazayithola yini ibhonasi.
UMoyo, osakhulayo, usole kakhulu kwezemfundo esithi yebo bathole imali kodwa ukuthi kwakhiwe izikolo ezimbalwa kuyadanisa njalo izisebenzi zikahulumende zitshiywe ebunzimeni ngoba abazi ukuthi bayathola yini ibonus.
UMnunzana Nkululeko Dube uvumelane loMoyo esithi ibudget kaChinamasa ibingelamnkatsho njalo yena usebenzela eSouth Africa ngakho kuzabanzima kulabo abafuna ukufaka imali yabo ekhaya ngoba iZimbabwe iyabumba imithetho kodwa ingalandelwa.
IZimbabwe iyagalula kwezomnotho. Kuviki eledlulileyo isungule imali yama bond notes uzulu othe kayifuni kodwa uMongameli Robert Mugabe wasebenzisa amandla akhe awaphiwa yisisekelo sombuso selizwe ukuthi kusetshenziswe imali le.
Kodwa iyasilele limali le njalo abantu bayathandabuza ukuba ibudget izaphumelela na lona ilizwe lingela mali.